Abutalıb Səmədov: “Qarabağdakı problemlərdən siyasi məqsədlər üçün istifadə eləmək Azərbaycana xəyanətdir”

Azərbaycan Prezidentinin SNN Türkə verdiyi müsahibə və daha sonra Kəlbəcər və Laçın səfərləri zamanı etdiyi çıxışlar ölkə ictimaiyyəti tərəfindən maraqla izlənir və orada qoyulan məsələlər bir daha “Dəmir Yumruq” birliyinin təminatı kimi çıxış edir.

Versus.Az xəbər verir ki, Azərbaycan Naminə Alyans Partiyasının sədri Abutalıb Səmədov mövzu ilə bağlı açıqlamasında  Prezidentin son çıxışlarında Rusiya və İranla olan münasibətlərimizə xüsusi diqqət göstərməsini qeyd edib. O, son dövrlər hər iki dövlətlə  yaşanan problemlərə təəssüflə yanaşıb və  hər iki dövlətə xarici işlər nazirliyimizin nota verməsini narahatlıq doğuran məqam kimi önə çəkib.  

“Azərbaycanın 44 günlük müharibədəki qələbəsi əksər dövlətləri narahat elədi və ABŞ, Fransa, Avropa Birliyinə daxil olan digər dövlətlər bizə qarşı cəbhə açdılar. Bu vəziyyətdə Rusiyanın son dövrlər atdığı addımlar xüsusilə narahatlıq doğurur. Çünki biz Minsk Qrupuna daxil olan həmsədr dövlətləri içərisində Rusiyanın nisbətən Azərbaycana yaxın mövqe tutmasına nail ola bilmişdik. Təəssüf ki, son dövrlərdə Rusiya da kifayət qədər ermənipərəst mövqe tutmağa başlayıb. Onun Qarabağda gördüyü işlər, verdiyi bəyanatlar bizi çox ciddi şəkildə narahat eləməlidir”.

Partiya sədri hesab edir ki, belə bir vəziyyətdə hər şeydə hakimiyyəti günahlandırmağa çalışmaq, Qarabağda üzləşdiyimiz problemlərdən yenə də siyasi məqsədlər üçün istifadə eləmək Azərbaycana xəyanətdir:

“Prezidentimiz kifayət qədər ciddidir. Çox böyük güclərə qarşı dayanmışıq. Azərbaycanın Qarabağa dair mövqeyini dünyada açıq şəkildə dəstəkləyən  dövlətlər azdır. Türkiyə və Pakistan. Üçüncü dövlət yoxdur. Ancaq əks mövqeni dəstəkləyənlər kifayət qədərdir. Hətta bizə yaxın olan Böyük Britaniya, İtaliya da onlara qoşuldu. Ona görə də belə bir vəziyyətdə siyasi partiyaların vəzifəsi əhalini çaşdırmaq, yanlış məlumatlar yaymaq, yenə də Qarabağ məsələsini siyasi alver predmetinə  çevirmək deyil. Onun vəzifəsi reallıqları xalqa çatdırmaq, dövlətin yanında yer almaqdır. Bizim vəzifəmiz Azərbaycan prezidentinə yardımçı olmaqdır. Anlamalıyıq ki, vəziyyət kifayət qədər ciddidir. İndiki diplomatik müharibədə üzləşdiyimiz çətinliklər 44 günlük müharibədə üzləşdiyimiz çətinliklərdən daha çoxdur. Birləşməsək, xırda məqsədlər güdsək, Azərbaycan üçün çox ağır nəticələr verə bilər". /hafta.az/

T.Qafarlı
Versus.Az