“Gürcüstanda seçki mübarzəsi dünənki səsvermə ilə yekunlaşmayacaq”
Əlabbas Məhərrəmli: “Seçkilərin ilkin nəticələri Qərbin Gürcüstana və ölkənin müxalifətinə münasibətinin dəyişdiyini söyləməyə əsas vermir”
“Rusiya heç kəsə heç nəyi diqtə etmədi və edəcək durumda da deyil. Məncə, Zurabişvilinin qazandığı səslərdə onun reytinqindən çox hökumətin administrativ resurslarının və İvanişvilinin pullarının böyük rolu olub”.
Bunu Versus.Az-a siyasi ekspert Əlabbas Məhərrəmli Gürcüstanda keçirilən prezident seçkiləri ilə bağlı nəticənin Qərb, yaxud Rusiya arasında gedən mübarizə fonunda önə çıxarılması ilə bağlı səslənən ehtimallara aydınlıq gətirərkən bildirib.
Ekspert Saakaşvili komandasının qalib olacağını düşünənlərin yanılması ilə bağlı maraqlı nüanslara toxunub:
“Əslində, yanılma demək doğru olmazdı. Seçkilərin birinci turunda üç əsas namizədin topladığı səslər Qriqol Vaşadzenin ikinci turda qalib gələcəyinə zəmin yaradırdı. Mən burada Mixail Saakaşvili düşərgəsinə mənsub olan David Bakradzenin elektoratının ikinci turda Vaşadzeyə səs vermək ehtimalının yüksəkliyini nəzərdə tuturam. Ancaq seçkilərin ilkin nəticələrinin açıqlanması hakimiyyət namizədinin irəlidə olduğunu göstərir. Açığı, müxalifət hələ səsvermənin davam etdiyi saatlarda belə hökumətin ciddi qanun pozuntularına yol verdiyini bildirirdi. Ona görə də fikrimcə, Gürcüstanda seçki mübarzəsi dünənki səsvermə ilə yekunlaşmayacaq”.
Bu seçkinin Qərbin Gürcüstanla bağlı hansı məqamlara aydınlıq gətirildiyinə gəlincə, ekspert Qərbin müxalifəti dəstəkləməsinin aydın məsələ olduğunu önə çəkib:
“Aydın məsələdir ki, Qərb Gürcüstan müxalifətini dəstəkləyir. Ancaq seçkilərin ilkin nəticələri Qərbin Gürcüstana və ölkənin müxalifətinə münasibətinin dəyişdiyini söyləməyə əsas vermir. Dediyim kimi, mübarizə yaxın müddətdə səngiməyəcək".
O ki, qaldı belə bir nəticə ilə Rusiyanın region və Qərbə nə isə diqtə etməsinə, Ə.Məhərrəmli bildirib ki, Rusiya heç kəsə heç nəyi diqtə etmədi və edəcək durumda da deyil:
“Sözsüz ki, Saakaşvilinin lideri olduğu müxalifətin Gürcüstanda hakimiyyətə gəlməsi Rusiyanın marağında deyil. Ancaq Rusiyanın seçkilərə birbaşa müdaxiləsi də düşünülən səviyyədə deyil. Məncə, Zurabişvilinin qazandığı səslərdə onun reytinqindən çox hökumətin administrativ resurslarının və İvanişvilinin pullarının böyük rolu olub”.
T.Qafarlı
Versus.Az
Xəbər lenti
Klipi üçün 10 kilo çəki atdı
Pərviz Mahmudov "Vurulmuşam" dedi