Nazarbayevin harada, hansı vəziyyətdə olması bu təcavüzün əsas hissələrindən biridir. Çünki, deyilənlərə görə, ortada, yəni qocanın şəxsi büdcəsində 50 milyard dollar vəsait var. Rus onun və talayacağı neçə-neçə yüz əlli milyard dollarların peşindədir. Yaxşı, bu Nazardan soruşan gərək: Ay Abış kişinin oğlu, dünya görmüş müdrik adamsan, o boyda sərvət sənin nəyinə gərək idi? Xalqın boğazından çıxarıb urusamı yığırdın onu sən, a tifağı dağılmış? Sən başa düşmürdünmü ki, ailə sərvətinin çoxluğu sənin devrilmək ehtimalınla düz mütənasibdir? Bu sualı, məsələn, elə Raxmona da vermək lazımdır.

 

İndi gələk adi məntiqə.

 

 

Sənin ölkəni düşmən orduları günün-günorta çağı bütün dünyanın gözü qarşısında basır, sən buna don geyindirirsən: birini çıxarıb o birini geyindirirsən və buna deyirsən: siyasət! Özü də böyük siyasət. Ölkənin yadellilər tərəfindən işğalı onun birdəfəlik yox olmasından daha traqikdir. Çünki burada söhbət təkcə maddi dəyərlərin yağmalanmasından deyil, onunla bərabər irqi genetikanın və milli mədəniyyətin mənimsənilməsindən və assimiliyasiyasından gedir. Mədəniyyət yaratmayan xalq bu dünyaya niyə gəlir? İki yüz il qazax xalqı ilə bərabər rusun nökəri olmuşuq. Nə bir dənə əsgərimiz, nə bir dənə tüfəngimiz, nə də raykomdan başqa bir milli güvənc yerimiz olub. Dinimiz də yüzilliklər boyu kafir düşmənə xidmət edib.30 ildə əldə etdiyimizi 300 illik rus ağalığı dövründə qazana bilməzdik. Rus buna dözmür, bizdən açıq-aşkar əl çəkmək istəmir. Çünki bizsiz, tək özü heç nəyə yaramır.

 

 

Nə etməli? Bilmirəm. Deyir, ağıllı fikirləşincə dəli vurub çayı keçər. İndi ola bilər ki, çay dəlini aparsın. Çay aparmasa da, sahildə onu külək aparacaq, ya da qurd-quş basıb yeyəcək - burası dəqiqdir. Çayda xilas şansı var.