Xırdalanın 7 saylı məktəbində “Mənim Abşeronum”

Abşeron rayonunun yaradılmasının 55 illik yubileyi ərəfəsində Xırdalan şəhər 7 saylı tam orta məktəbdə “Mənim Abşeronum” adlı tədbir keçirilib.

Versus.Az-ın məlumatına görə, sinifdənxaric və məktəbdənxaric işlər üzrə direktor müavini Ayna Məmmədovanın təşkilatçılığı və aparıcılığı ilə keçirilən tədbirin ssenarisini Azərbaycan dili və Ədəbiyyatı müəlliməsi Aynurə Rəcəbova yazıb, texniki məsələlərə isə Musiqi müəlliməsi Pərvin Əşari yardımçı olub.

Tədbirdə Şövkət Ələkbərovanın ifasında Nəbi Xəzrinin sözlərinə yazılmış “Qəlbimdə Qaldı” mahnısı səsləndirilib, Abşeron rayonu haqqında slayd nümaiş etdirilib.

Daha sonra məktəblilər hər biri ayrı-ayrılıqda Abşeron rayonuna aid olan qəsəbələr haqqında ətraflı məlumat veriblər.

Şagirdlər Aynurə və Pərvin müəllimənin ssenarisi ilə hazırlanmış müxtəlif nömrələr, səhnəciklərlə çıxış edərək Abşeron kənd və qəsəbələrində dünya miqyasında tanınan onlarca dövlət xadimi, şair, dramaturq, aktyor, rəssam, incəsənət adamlarından bəhs ediblər. Onlar Abşeron rayonuna yazmış olduqları şeirləri söyləyib, müalicəvi xüsusiyyəti ilə dünyaca məşhur Abşeron neməti olan zəfərana bəstələnən mahnı-rəqsi ilə tədbirə rəng qatıblar.

Tədbirin sonunda çıxış edən məktəb direktoru Zemfira Orucova öncə Prezident İlham Əliyevi məktəb kollektivi adından ad günü münasibətilə təbrik edib, ona cansağlığı arzulayıb. Direktor bildirib ki, ölkə başçısının apardığı uğurlu siyasət və qayğısı sayəsində Abşeron rayonunda da böyük, nəzərəçarpacaq dərəcədə abadlıq işləri görülüb. Məktəb direktoru vurğulayıb ki, bu inkişaf özünü o cümlədən ümumtəhsil sahəsində də göstərib.

Z.Orucova qeyd edib ki, öz şan-şöhrəti, füsunkar təbiəti, tükənməz təbii sərvətləri ilə Azərbaycanı dünyaya tanıdan, ona baş ucalığı gətirən Abşeron rayonu əzmkar rayon rəhbərliyinin əməyi nəticəsində daim parlaq zirvələrə ucalır.

Yelmar Nəbiyev
Versus.Az