Ruslan İmamquliyev: “Psixoloji müharibədə də tam üstünlük Ukraynadadır”

Artıq Rusiyanın fevralın 23-dən Ukraynaya başlanan hərbi müdaxiləsinin ilk həftəsi bitir. Yüksək hərbi gücə malik olan Rusiya Ukrayna üzərindəki hərb siyasətini istədiyi kimi sürətləndirə bilmir.

Nə baş verir: Rusiya-Ukrayna müharibəsində mövcud vəziyyət nədir?

Versus.az xəbər verir ki, tanınmış hərbi ekspert, M5 Müdafiə və Strategiya jurnalının regional rəhbəri Ruslan İmamquliyev şərhində Rusiya-Ukrayna savaşı ilə bağlı təhlillər apararaq bir neçə əsas nüansın üzərində dayanıb.

R.İmamquliyev qeyd edib ki, Rusiyanın hücum edən və Ukraynanın müdafiə olunan tərəf olduğunu və iqlim, ərazi, süni əngəllər, qüvvə nisbətini nəzərə alaraq demək olar ki, əməliyyatları davam etdirə bilmək üçün Rusiyanın əlavə qoşunlar cəlb etməsinə ehtiyac var. Amma mövcud vəziyyətdə ölkədaxili etirazlar səbəbi ilə bunu etməsi mümkünsüz görünür. Hətta bu səbəblə KTMT-yə üzv dövlətlərdən dəstək almaq istəyə bilər. Bunun üçün isə səbəblər yaratmaq təcrübələri keçmişdən bilinməkdədir.

Hərbi ekspert bildirib ki, Rusiyanın hücum əməliyyatlarının ilk günündə havada üstünlük qazana bilməməsi əməliyyatların gedişatını dəyişdi:

“Rus qoşunlarının döyüş sahəsində iri kolonlarla hərəkət etməsi daha öncədən hava üstünlüyünün onlarda olacağına kəsinliklə əmin olduqlarına hesablanması ilə bağlıdır. Amma bu faktor üzərində yalnış hesabat aparılması rus birləşmələrinin daha açılmadan məhv edilməsi ilə nəticələndi”.

R.İmamquliyev Döyüş Sahəsinin Kəşfiyyat Hazırlığında Ukraynanın NATO-dan gələn kəşfiyyat məlumatları ilə dəstəklənməsini önəmli bir üstünlük kimi önə çəkib. Eyni zamanda, bir neçə əsas faktora diqqət çəkib:

“Rus ordusunun auftragstaktik (mission command) nəzəriyyəsi əsasında idarə olunması zəif olduğu üçün geniş cəbhədə qoşunların idarə olunması tamamən nəzarətdən çıxmış vəziyyətdədir. Rus ordusu əsasən mərkəzləşdirilmiş idarə etməyə görə yetişdirilib. Ukrayna ordusu isə bu faktoru psixoloji əməliyyatlarla tənzimləməkdədir.

NATO-nun radio elektron mübarizədə verdiyi dəstəklə Rusiyanın qoşunları idarəetmədə rabitə vasitələrinin istifadə edilmə imkanı ciddi dərəcədə məhdudlaşdırılmışdır. İnformasiya Müharibəsində üstünlük tamamən Ukraynanın lehinədir və kontrol edilir şəkildə idarə olunmaqdadır.

Döyüşən tərəflərdən Ukrayna Prezidentinin yaxın ətrafı və generalları ilə bərabər döyüş sahəsində olması və bunu kütləvi informasiya vasitələri ilə göstərə bilməsi psixolojik müharibədə tam üstünlükdür. Daha çox faktorlar üzərindən fikir yürütmək mümkündür. /hafta.az/

T.Qafarlı
Versus.az