Evində arvadını adam yerinə qoymayan xeyli kişi var...

 XƏYAL NAMİZƏDLİ

Selektiv abort sahəsində 3 dünya liderindən biri kimi qadını doğulmamış zorakılığa məruz qoyan xalqıq. Nə qadın hüququ, kakoy zorakılıq, davay, bozbaşını bişir...

Sizə elə gəlir ki, "bozbaş bişirmək" ifadəsi köhnəlib? Ciddidən elə fikirləşirsiz? O zaman uzağa yox, öz evinizə baxın, kim bişirir yeməkləri? Kim təmizləyir evi? Uşağa kim baxır? Hamam-tualet təmizliyinə kim baxır? Mətbəx kimin sayılır?

Əgər öz evinizdə bunlar 50/50-ə bölüşdürülübsə, afərin və bircə addım o yana baxın - dostunuzun, qardaşınızın, belə özünü müasir hesab edən, lap belə Azərbaycanda insan hüquqlarının pozulmamasını arzu edən, mübarizə aparan adamların ailələrinə. Neçəsində 50/50-ə bölgü var?

Məncə 1% olmaz. Tak şto, tovarişi, biz toplum olaraq qadınları "bozbaş bişirən", "tualet təmizləyən" kimi görürük. Toplum olaraq yox, şəxsən belə görənlərə isə qərb təhsilli, müasir, canım sənə desin, mübariz, dəyanətli, mətanətli kişilərimizin də 99%-ə qədəri aiddir.

Qərb ölkələrinə gedəndə qəribə görsənir hə, küçəni qadınlar süpürmür, tualeti qadınlar təmizləmir... Əslində orda bunu qadınlar da edir, kişilər də. Əgər ümumiyyətlə, bu tip işlər varsa - məsələn, küçəni maşınla təmizləyirlər. Bəs bizdə niyə qadınlardır yalnız? Çünki mahiyyətimiz budur - hamımızın evində bu işi görən qul qadındır...

Hamının məişət həyatı var. Sən məişətdə tətbiq olunan şeylər barədə çox da yekə-yekə danışa bilməzsən, əgər səmimisənsə. Təbii, danışanlar var, qadın hüquqlarından danışıb, evində arvadını adam yerinə qoymayan xeyli kişi var. Amma çətindir, yalan danışmaq çətin şeydir. Adam özü də bilmir ki, əlində hakimiyyət olsa nə zibillər yeyər. Amma evdə elədiyi qələtləri bilir axı. Götürüb ictimai şəkildə o evdə etdiklərinə zidd şey danışanda özü də əziyyət çəkir.