Fuad Əliyev: "Əhalinin sayı çoxdur, deputatların sayı artırılmalıdır"

Hakimiyyət islahatlara başlayan gündən  Azərbaycan Konstitusiyasına dəyişikliklərlə bağlı referendumun keçiriləcəyi barədə məlumatlar vaxtaşırı gündəmə gəlir. Referenduma çıxarılacaq məsələlər çoxdur. Xüsusilə Vətən müharibəsindən sonra ərazi-inzibati quruluşun dəyişdirilməsi kimi məsələ fə referenduma çıxarılacaq məsələlərə əlavə olundu.

Bununla bağlı Versus.Az-a açıqlama verən Azərbaycan Liberal Demokrat Partiyasının (ALDP) sədri Fuad Əliyev bildirib ki, islahatların axıra gədər aparılması hakimiyyətin iradəsindən asılıdır.

ALDP sədrinin sözlərinə görə, islahatlar sürətlə başlasa da, sonrakı mərhələdə dayandı:

"Bir çox məsələlərə aydınlıq qətirilməlidir. Misal üçün, icra hakimiyyəti sistemində olan zidiyyət - Nazirlər Kabineti ilə vitse-prezidentlik institutu arasındakı ziddiyyətin aradan qaldırılması məsələsi. Mən hesab edirəm ki, Nazirlər Kabineti ləğv olunmalıdır və onların səlahiyyətləri vitse-prezidentlik institutuna verilməlidir. İkinci bir məsələ. Şəhər və rayon icra hakimiyyət strukturları ləğv olunmalıdır. Biz təklif vermişik ki, yeddi ərazi-inzibati nümayəndəliyi olmalıdır. İcra strukturların səlahiyyətləri tam olaraq bələdiyyələrə keçməlidir”.

Hökumətin sentyabrda referendumla bağlı Milli Məclisdə müzakirələrə başlayacağı kimi məlumatlara gəlincə, Fuad Əliyev Parlamentin payız sesiyasında müzakirəyə çıxarılacaq məsələlər bağlı məlumatsız olduğunu vurğulayıb:

"Onu bilirəm ki, referendum məsələsi hələ ki, qeyri rəsmi söz-söhbət səviyyəsindədir. Amma bu hakimiyyətdən nə desən çıxar. Ola bilsin ki, payız sesiysında bir neçə məsələ müzakirəyə çıxarılsın, o cümlədən, proporsional seçki sistemin bərpası, deputatların sayı və yuxarıda qeyd etdiyim məsələlər. Milli Məclis müzakirələrdən sonra referenduma getmək haqda qərar versin”.

Proporsional seçki sistemini ölkənin siyasi sistemi üçün çox önəmli sayan ALDP sədri müxalif nümayəndələrin vaxtaşırı bu məsələni gündəmdə saxladıqlarını qeyd edib:

“Təəssüf ki, 2002-ci ildə müxalifət bu məsələdə bizə dəstək vermədi. Amma sonraki illərdə proporsional seçki sistemin bərpası ilə bağlı, biz də daxil olmaqla, müxalifət partiyalar bu məsələni daima gündəmdə saxladı. Hesab edirəm ki, referenduma çıxarılacaq məsələlərdən biri də proporsional seçki sisteminin bərpası olmalıdır. Əhalinin sayı on milyondan çoxdur. Ona görə hesab edirəm ki, deputatların sayı da artırılmalıdır. Bütün yuxarıda qeyd etdiyim məsələlər həyata keçsə, bunu islahatların davamı kimi qiymətləndirmək olar”.

Bakı şəhər mer seçkisinin keçirilməsi və bu vəzifəyə iddialı olan Fuad Əliyev, böyük şəhərlərin mer seçkilərin keçirilməsinin vacib olduğunu və bununla bağlı təkliflərin göndərdiyini geyd edib.

SEVDA
Versus.Az