Dünyanın ən böyük konserti

Kolumbiyalılar ən çox iştirakçı ilə konsert keçirərək dünya rekordu qırıblar.

Boqotadakı Mərkəzi Parkda hər yaşdan olan 16.000 musiqiçi və xor ifaçısı toplaşıb.

Onlar Bethovenin 9 nömrəli simfoniyasından bir parça, argentinalı müəllifin “Sülh göyərçinləri” mahnısını və daha dörd musiqi parçasını ifa ediblər.

“Bu, inanılmaz təcrübədir. Özünü iynə üstündə hiss edirsən, çünki gözəl musiqiçilər görürsən. Bu qədər gözəl ifaçılar arasında olmaq və musiqiyə qarışmaq necə gözəldir”, - deyə iştirakçılardan biri hisslərini ifadə edib.

Konsertdə Boqota Filarmonik Orkestri də çıxış edib.

Tədbir yerli hakimiyyət orqanları, ölkənin Təhsil Nazirliyi və Mədəniyyət Nazirliyi tərəfindən dəstəklənib.

“Konsertdə iştirak edən uşaqların valideynləri hesab edirlər ki, musiqi dərsləri uşaqların davranışlarını və başqaları ilə ünsiyyətini yaxşılaşdırmağa kömək edə bilər. Cəmiyyətin bu şəkildə qurulması mümkündür” – deyə qeyd edilib.

Konsert Kolumbiyada uzun müddətdir davam edən hərbi münaqişə tərəfləri arasında barışığa həsr olunub.