Deputat İranda səfirliyimizi qoruyan şəxsin ailəsi ilə görüşüb

Millət vəkili, Milli Cəbhə Partiyasının sədri Razi Nurullayev rəhbərlik etdiyi partiyanın bir qrup heyəti ilə İrandakı səfirliyimizə hücum zamanı qəhrəmanlıq göstərən Vasif Tağıyevlə görüşüb.

Bu barədə Versus.az-a MSP-dən məlumat verilib.

Milli Cəbhə Partiyası - MCP sədri, deputat Razi Nurullayev bu haqda özünün  sosial şəbəkə hesabında da yazıb. R.Nurullayev bildirib ki, Vasif doğrudan da qəhrəmanlıq edib.

"Bu gün, İranda səfirliyimizi təkbaşına bir saat ərzində qoruyan və yalın əllə terrorçunu zərərsizləşdirən qəhrəmanımız Vasif Tağiyevi Milli Cəbhə Partiyası - MCP olaraq evində ziyarət etdik, ailə üzvlərini, övladlarını gördük, atası, qaynatası, qohumları ilə söhbət etdik.

Televiziyada görmək və dinləmək başqa, canlı olaraq dinləmək və o həyacanı yaşamaq başqa.  Bir daha əmin olduq ki, məlum hadisə əvvəlcədən təşkil olunmuş terror aktıdır və İran rəhbərliyinin də xəbəri olub".

Görüşdə MCP-nun dini məsələlər üzrə müavini Tural İrfan, partiyanın hüquq şöbəsinin müdiri Vugar Dadaşov, partiyanın qadınlar şurasının sədr müavini Sədaqət Əliyeva da iştirak edib.

Qeyd edək ki, Vasif Tağıyevi ölkə Prezidenti" Rəşadət Ordeni "ilə təltif edib.

"Var ol vətən oğlu!"-deyə, R.Nurullayev minnətdarlığını ifadə edib.

Versus.az