Tural İrfan: "Sovet dövrünün ateist təfəkkürünün qalıqlarından birdəfəlik qurtulmalıyıq"

"Dünyada müsəlman ölkələri müxtəlif əlamətdar günlərdə, müqəddəslərin doğum-mövlud günlərində Quran qiraəti müsabiqələri keçirirlər. Bu həm də həmin şəxsin, şəhidin təbliğatına xidmət edir. Təklif edirəm ki, 20 yanvar, 26 fevral, 31 mart soyqırım tarixlərimizi dünya müsəlmanlarına davamlı çatdırmaq, unudulmağa qoymamaq üçün hər il bu ərəfələrdə Quran müsabiqələri keçirilsin, bütün dünyanın müsəlman ölkələrindən Quran qariləri dəvət edilsin".

Bunu Versus.Az-a açıqlamasında AXCP sədr müavini, İlahiyatçı-yazar Tural İrfan bildirib.

Tural İrfan qeyd edib ki, oxunan Quranlar şəhidlərimizin ruhuna həvalə edilərək millətimizin başına gətirilən faciələr daha aktiv xatırlansın və təbliğ olunsun, islam qaydalarına uyğun:

"20 yanvar faciəsi və Xocalı soyqırımının anım tarixlərində qaboy və klarnet sədaları əvəzinə, milli ənənəmizə uyğun olaraq Qurani kərim sədaları səslənsin. Çünki milli adətimizdə ölünü, şəhidi klarnetlə anmaq, xatırlamaq yoxdur. Bu adət ermənilərdə - xristianlarda mövcuddur. Necə olur ki, həmin şəhidlər Quran tilavəti ilə dəfn edilir, ancaq sonra qaboyla xatırlanır. Hesab edirəm ki, bu Sovet dövrünün ateist təfəkkürünün qalıqlarıdır. Bu qalıqlardan birdəfəlik qurtulmalıyıq".

İlahiyyatçı-yazar Dini Qurumlarla iş üzrə Dövlət Komitəsinə bu məsələni nəzərə almasını təklif edir:

"Habelə deputlarlardan, dinə yaxın olduğu üçün xüsusən Fazil bəy Mustafadan da ricam budur ki, bu məsələni milli Məclisdə təklif kimi səsləndirsin. Şəhid qaboyla yad edilməz, şəhid Quranla yad edilər".

G.Nəcəfli
Versus.Az