“Özlərini keçmiş daxili işlər nazirinin “işçi”ləri kimi aparan qrup”

“Mən bundan əvvəl də demişdim, indi də deyirəm növbədənkənar parlament seçkilərinin keçiriləcəyi haqda qərar verilən gün Azərbaycan Xalq Hərəkatında parçalanma baş verəcək”.

Bunu Versus.Az-a siyasi ekspert Əlabbas Məhərrəmli bu gün Xalq Hərəkatında baş verən ziddiyyətləri və kökündə dayanan səbəbləri açıqlayarkən bildirib.

Ekspert bildirib ki, növbədənkənar seçkilər hələ təyin olunamasa da, bu istiqamətdə müzakirələr davam etməkdədir. Hərəkatda yaranan və dərinləşən ziddiyyətlərin kökündə də həmin müzakirələr dayanır:

“Diqqət edin, Hərəkatın bir qütbündə seçkilərdə iştiraka meylli olan, özünü, partiyasını Milli Məclisdə görən təşkilat və siyasətçilər, digər qütbündə isə özlərini keçmiş daxili işlər naziri İsgəndər Həmidovun “işçi”ləri kimi aparan qrup var. O qrupdakılar danışanda da bütün nəzərləri Həmidovun üzündə olur.

Ona görə də, hesab edirəm ki, Hərəkatın parçalanmasının rəsmiləşməsi zaman məsələsidir. Hər kəs görür ki, Hərəkatın daxilində çox az sayda müstəqil fiqur var, qalanları yalnız icraçılardır.

Onların arasında elə partiya sədrləri var ki, yuxudan oyatsan, öz partiyasının adını da xatırlamayacaq. Amma danışanda elə iddialı olurlar ki, sanki ildə iki dəfə qurultay keçirirlər”.

SEVDA
Versus.Az