"Pyotr Poroşenkonun yenidən prezident seçilmək şansı daha çoxdur"

"Ukraynada prezident seçkilərinin aprelin 21-də keçiriləcək.

II turunda namizədlərdən hazırki dövlət başçısı Pyotr Poroşenkonun yenidən prezident seçilmək şansı daha çoxdur".

Versus.Az milli.az-a istinadla bildirir ki, bu fikirləri "Baku International Policy and Security Network" Ekspert qrupunun rəhbəri, təhlükəsizlik və beynəlxalq məsələlər üzrə ekspert, professor Elxan Ələsgərov deyib.

Ekspertin fikrincə, Ukraynada prezident seçkilərində yumorist, şoumen Vladimir Zelenskinin ilk turda hazırkı dövlət başçısı Pyotr Poroşenkodan daha çox səs toplaması onun 2-ci turda da qalib gələcəyini deməyə əsas vermir:  

"Rusiya ümid edirdi ki, Poroşenko seçkilərin 2-ci turuna keçməyəcək. Çünki bu şəxs tam Rusiyaya qarşı siyasət yürüdür. Lakin Poroşenko əlində olan dövlət resurslarından, mətbuatın imkanlarından istifadə edərək Yuliya Timoşenkonu qabaqlayaraq ikinci tura keçə bildi. Ehtimal var ki, o, yenidən prezident seçilsin. Çünki Zelenskinin yumorlu siyasəti Ukraynada bəzi dairələrdə normal qəbul edilmir. Bundan əlavə, orada milli məsələlər də var. Belə ki, milliyyətcə ukraynalı olmayanın Ukrayna prezidenti seçilməsi çətin məsələdir. Ona görə də hesab edirəm ki, Pyotr Poroşenkonun yenidən prezident seçilmək şansı daha çoxdur. Onun ikinci tura keçə bilməmiş digər namizədlərlə, xüsusən Yuliya Timoşenko ilə koalisiyaya gedəcəyi də istisna deyil. Lakin orda əsas və həlledici rol oynaya bilən məsələ onun əlindəki dövlət resurslarıdır. Bundan başqa, Rusiyaya qarşı olduğu üçün o, Qərb tərəfdən də ciddi şəkildə dəstək alır".

Qeyd edək ki, Ukraynada prezident seçkilərinin ilk turunda hamıdan çox səs totplamış Vladimir Zelenski Krivoy Roq şəhərində doğulub və yəhudi əsillidir.

Versus.Az