Aydın Mirzəzadə: "AXH kiçik bir qrupdur və onların heç bir perspektivi yoxdur"

Fuad Əliyev: "AXH zəif bir təşkilat olsa idi, bu qədər təzyiqlər olmazdı"

“Siyasətçi kimi Azərbaycanda olan bütün siyasi prosesləri izləyirəm. Azərbaycan Xalq Hərəkatı kiçik bir qrupdur və onların heç bir perspektivi yoxdur. Onlar arasında olan qarşılıqlı ittihamlar ilk növbədə perspektivsizliyi ilə əlaqəlidir”.

Versus.Az AnTV.az-a istinadən xəbər verir ki, bu sözləri Azərbaycan Xalq Hərəkatının fəaliyyəti ilə bağlı açıqlamasında millət vəkili Aydın Mirzəzadə deyib.

Azərbaycan Liberal Demokrat Partiyasının (ALDP) sədri, Azərbaycan Xalq Hərəkatının (AXH) həmtəsisçisi və İdarə Heyətinin üzvü Fuad Əliyev deputatın bu açıqlamasına cavab verib:

“Aydın Mirzəzadənin fikirlərinə hörmətlə yanaşır və hakimiyyət nümayəndələrinin bu cür açıqlama verməsini normal qarşılayıram. Azərbaycan Xalq Hərəkatının fəaliyyəti sürətlə artır, bir neçə aya yeni bir dalğa yaradacaq. Əgər, AXH zəif bir təşkilat olsa idi, bu qədər təzyiqlər olmazdı".

Deputatın AXH-də olan siyasilər arasındakı qarşılıqlı ittihamların olması fikrinə gəlincə, partiya sədri AXH-də heç bir qarşıdurma olmadığını, İdarə Heyətinin bütövlükdə fəaliyyət göstərdiyini vurğulayıb:

"AXH-də fikir ayrılıqları ola bilər. Bu da ki, demokratiyanın göstəricisidir. AXH-nin bütün iclasları birbaşa mediaya açıqdır. Aydın Mirzəzadənin təmsil etdiyi YAP-da bu belə deyil. Təklif edirəm ki, Yap AXH-dən örnək götürüb, öz iclaslarını canlı yayımlasın. O zaman bilinəcək demokratiya haradadır”.

Versus.Az