Əlabbas Məhərrəmli: “Ermənistan işğal etdiyi Azərbaycan ərazilərinin heç olmasa bir hissəsini boşaltsaydı...”

Azərbaycan və Ermənistan xarici işlər nazirlərinin Moskva görüşündə humanitar sahədə vacib hesab olunan “razılaşdırılmış” üç əsas məqam ətrafında müzakirələr, təhlillər bu gün də davam edir.

Qeyd edək ki, həmin məqamlardan biri, əsirlikdə saxlanılan hərbçilərin ailə üzvləri ilə görüşə bilməsi üçün tədbirlər görülməsi barədə razılıq əldə ediblər. İkincisi, xarici işlər nazirləri iki ölkənin sakinləri arasında təmasların qurulması, o cümlədən KİV nümayəndələrinin qarşılıqlı səfərləri yolu ilə konkret işlərə başlamağa hazırlıqlarını ifadə ediblər. Üçüncüsü isə onlar kənd təsərrüfatı işləri zamanı münaqişə zonasında sabit vəziyyətin saxlannması barədə razılığa gəliblər.

Humanitar sahədə önə çəkilən bu məqamlar beynalxalq güclərin xalqın sülhə hazırlanması prosesində irəliyə doğru addım kimi irəli sürülür. Lakin işğal faktının aradan qaldırılması ilə bağlı ciddi addımların atılmaması, işğalçı dövlətə qarşı hər hansı sanksiyanın tətbiqi ilə bağlı məsələnin dilə gətirilməməyi missiyasının danışıqlarda manipulyasiya etdiyini önə çıxarır.

Görüşdə humanitar məqamların “xalq diplomatiyası”nın elementləri olduğu aydındır və bu diplomatiyanın torpağı işğalda qalan xalqa nələri vəd etdiyi müxtəlif aspektlərdə təhlil olunmaqdadır.

“Sergey Lavrovun açıqladığı “yaxınlaşma” tipli “razılaşma” münaqişənin dinc yolla həlli istiqamətində hər hansı ümid yaratmır” 

Görüşün şərtlərini  şərh edən siyasi ekspert Əlabbas Məhərrəmli Versus.Az-a bildirib ki, Azərbaycan və Ermənistan xarici işlər nazirlərinin sonuncu Moskva görüşündən sonra Sergey Lavrovun açıqladığı “yaxınlaşma” tipli “razılaşma” münaqişənin dinc yolla həlli istiqamətində hər hansı ümid yaratmır. 

“Məlum olur ki, bu “razılaşma” qarşılıqlı səfərlər, o cümlədən jurnalistlərin səfərlərinin həyata keçirilməsini də nəzərdə tutur. Xatırladım ki, bundan əvvəl də QHT-lər səviyyəsində “xalq diplomatiyası”nın gücləndirilməsinə cəhdlər olmuşdu. Amma o cəhdləri nə münaqişənin nizamlanmasına, nə də qarşılıqlı etimadın yaranmasına təsir göstərmədi”.

Ə.Məhərrəmli  hesab edir, “xalq diplomatiyası” indi də nəticəsiz qalacaq. Ona görə ki, münaqişənin həllinə yönəlik heç bir razılaşma yoxdur. Əgər anlaşma yoxdursa, qarşılıqlı səfərlərin faydası nədir?

“Ermənistan işğal etdiyi Azərbaycan ərazilərinin heç olmasa bir hissəsini boşaltsaydı, o halda bu məsələnin perspektivi olardı. İndiki halda isə belə bir zəmin yoxdur”.

Politoloq eyni zamanda qarşılıqlı səfərlər məsələsinə münasibət bildirən Azərbaycan jurnalistlərinin mövqeyini dəstəkləyib.

“ Onlar Azərbaycan ərazisi olan Dağlıq Qarabağa Ermənistandan keçib getməyin qəti surətdə əleyhinə çıxıblar. Bu, doğru yanaşmadır”.

Ləman
Versus.Az