Fuad Əliyev: "Eyni anda eyni adlı komitədə qalmağı mətnqtiqsiz hesab etdik"

“Aprelin 20-də Xalq Hərəkatının ilk məclisi keçiriləcək. Yəqin ki, həmin Məclisdə Xalq Hərəkatı Qarabağ Komitəsinin adından hər kəsə müraciət qəbul olunacaq”.

Bunu ALDP sədri Fuad Əliyev Versus.Az-a aprelin 20-də keçiriləcək məclisin işi və Qarabağ Komitələrinin gələcək aqibətləri ilə bağlı gözləntilərini açıqlayərkən deyib:

“Yaxşı olardı ki, Qarabağ Azadlıq Təşkilatının Qarabağ Komitəsi ilə Xalq Hərəkatının Qarabağ Komitəsi birgə tədbirlər keçirsinlər. Dövlətimizin bütövlüyü naminə apardığımız mübarizədə məqsəd birdirsə, mübarizəmiz də bir, yekdil olmalıdır”.

F.Əliyev bildirib ki, Qarabağla bağlı çox birliklər yarana bilər, amma Qarabağ birdir və hamı onun ətrafında birləşməlidir:

“Hesab edirəm ki, QAT sədri Akif Nağı özü heç bir quruma üzv olmadan daha uğurlu işləyirdi. Sonra Qarabağ Komitəsi yarandı və fikir haçalanması baş verdi. Qarabağla bağlı haçalanmanı düzgün hesab etmirəm. Xalq Hərəkatı Təşkilatı yaranandan sonra biz də həmin quruma daxil olduq və burda da bir Qarabağ Komitəsi yarandı. Sadəcə olaraq eyni anda eyni adlı komitədə qalmağı mətnqtiqsiz hesab etdik”.

LƏMAN
Versus.Az