İraq Türkməneli Partiyası və Ulusal İttifaq Partiyası arasında anlaşma protokolu

İraq Türkməneli Partiyasının qərargahından Versus.az-a verilən məlumata görə, mayın 15-də Kərkükdə Türkməneli Partiyası və Ulusal İttifaq Partiyası arasında “Kərkük koalisiyası” adlı anlaşma protokolu imzalanıb. Protokolu Türkməneli tərəfindən Kərkük şəhər nümayəndəsi Muxtar Həsən, Ulusal İttifaq Partiyası tərəfindən Kərkük şəhər nümayəndəsi Üstat Kamil imzalayıblar.

Məlumatda bildirilir ki, “Kərkük koalisiyası”nın əsas məqsədi bölgədə yaşayan bütün xalqların – türkmənlərin, ərəblərin, kürdlərin, eləcə də, digər etnik qrupların sulh, barış içərisində qonşuluq və qardaşlıq prinsipləri çərçivəsində yaşamasıdır:

“Hansı ki, Kərkükdə zaman-zaman bütün etnik qruplardan olan sadə xalqlar, millətlər dinc yanaşı yaşayıblar. Təəssüf ki, bölüşdürücü qüvvələr, terror birləşmələri sabitliyin daimi olmasına imkan verməyiblər. Kərkük elə bir bölgədir ki, burada yaşayan, İraqın müxtəlif kəsimlərindən olan insanların dini inancına, tarixinə, mədəniyyətinə, adət-ənənəsinə həmişə hörmətlə yanaşılıb. Bu istiqamətdə çalışmaq, fəaliyyət göstərmək həm də bölgənin, insanlarımızın təhlükəsizliyi baxımından çox önəmlidir”.

Aganisə Sultanova
Versus.az