Bu şanlı gün Azərbaycan insanına əmr edir

15:31 28-05-2019 | icon 267 | Köşə
Bu şanlı gün Azərbaycan insanına əmr edir

Millətin azadlığı, dövlətin sərhəd bütövlüyü ona hədiyyə kimi verilmir, gərək…

 TAHİRƏ QAFARLI

 

Bu gün Azərbaycan insanı keçmişini işıqlandıran şəfəqə doğru yürüyür. Tarixi irsin 101 illik dərinliyindən bu gününə işıq saçan şölələr insanlarımıza dünəninə qayıdışı, özünü tanıması, tarixinə fərəh, qürur hissi ilə baxması, ləyaqətli vətəndaş olaraq irəliləməsi üçün yeni ruh verir.

 

Bu gün müasir Azərbaycan insanı 101 yaşlı Xalq Cümhuriyyətinin ənənələrini davam etdirən varislər kimi, millətlər içində var olma, daha da güclənmə amacı ilə bu şanlı tarixdən örnək alaraq yenidən yaşayır. Bu gün bu tarix ona ümid verir. Bir daha xatırladır ki, 101 illik demokratik keçmişi olan bir ölkənin insanı olaraq bütün mərhumiyətlərinə baxmayaraq yaşamalı, ayaqda durmalı, milli məfkurəni əks etdirib millətin, dövlətin həyatını aydınlatmalıdır!

 

Bax, Azərbaycan Xalq Cümhuriyyətinin yaranması gününü bayram edən insanlarımız hər şeydən çox bu istəklə başını qaldırıb yüksəklərdə dalğalanan müstəqil dövlətin üç rəngli bayrağını qürurla seyr edirlər...

 

Bəli, "Bir kərə yüksələn bayraq, bir daha enməz!"- deyən Xalq Cümhuriyyətinin qurucusu Məhəmmədəmin Rəsulzadə millətin Azadlıq mücadiləsinin qarşısında heç bir gücün, heç bir hiylənin tab gətirə bilməyəcəyini bəyan edərkən, bu gün bayraq ətrafında sevgilə toparlanan bizlərin milli birliyinə inanırdı. Və bu gün Azərbaycan insanı 28 may müstəqillik gününü bir həmrəylik, düşmənə qarşı bir mücadilə hərəkatına qoşulma aksiyası kimi yenidən yaşadır...

 

Bu gün Azərbaycan insanı 101 il əvvəl müsəlman Şərqində yaranan ilk dünyəvi demokratik ölkəni, Azərbaycan Xalq Cümhuriyyətini yaradan millətin nümayəndəsi olmasından qürur hissi keçirir. Tarixin Azərbaycanın dövlət quruculuğu səhifələrini izlədikcə, Demokratik Respublikanın hansı gərgin və mürəkkəb ictimai-siyasi şəraitdə fəaliyyət göstərməsi və cəmi 23 aydan sonra 2 yaşına dolmadan bolşeviklərin hücumuna məruz qalaraq devrildiyinə təəssüf hissi ilə yanaşır. O zaman Sovetlər Birliyi, Azərbaycanı məcburi surətdə öz tərkibinə daxil etdi. Lakin ruhunda azadlıq eşqi olan Azərbaycanın istiqlalçılıq ideyası yenilmədi və o, 1991-ci ildə yenidən öz müstəqilliyini bərpa etdi... Şəhidlərin Qanı bahasına...

 

Azad, müstəqil, sərhədləri bütöv, təhlükəsiz, hüquqları beynəlxalq müstəvidə tanınan və demokratik seçki mədəniyyətinə sahib olan inkişaflı bir ölkənin vətəndaşı olmaq hər bir adi insan üçün təbii bir istəkdir, yaşamdır. Lakin o istəyi həyata keçirmək eyni zamanda cəsarət, milli ləyaqət tələb edən bir nəsnədir. Çünki millətin azadlığı, dövlətin bütövlüyü ona hədiyyə verilmir. Onun uğrunda qanlar tökülür, canlar alınır…

 

Bəli, Azərbaycan Xalq Cümhuriyyəti də mücadiləsiz yaranmadı. Onun uğrunda şəhidlər verildi və bu gün də torpaqlarımız uğrunda şəhidlər veririk. Torpaqlarımızın işğaldan azad olunması uğrunda mücadiləmiz davam edir...

 

Bu gün Azərbaycan torpaqlarının bir hissəsi erməni quldurları tərəfindən işğal olunub və 27 ildir ki, insanlarımız öz haqlarını qorumaq, müharibəsiz bir ölkədə yaşamaq üçün düşmənlə üz-üzə dayanıb. Eyni zamanda da dünyaya sülh vəd edən beynəlxalq ədalətin nəhyət öz yerini tutacağını gözləyir. Azərbaycan insanı nigarandır. Çünki Azərbaycanı özünün maraqları naminə düşmənə "yem" etmək istəyən erməni havadarları Azərbaycanın müstəqilliyi üçün böyük təhlükə yaradırlar. Beynəlxalq aləm erməni faşizminin törətdiyi cinayətlərə göz yumur. Azərbaycan insanı 4 tərəfdən öz torpaqları ilə həmsərhəd olmağa məhkum edilmiş coğrafi mənzərə ilə əhatə olunub. Dünya birliyinin ölkəmizi hansısa öz şəxsi maraqlarına boyun əydirmək siyasəti bu gün Azərbaycan insanını öz şanlı tarixinə güvənməyə dəvət edir. Bu tarixi gün ona xatırladır ki, milli ləyaqət hissi ilə öz bayrağına sarılıb savaşmasa başqa millətlərin şikarı olmaq təhlükəsi qaçılmazdır.

 

Bu şanlı gün Azərbaycan insanına vətən üçün şəhid olmağa hazır dayanmağı əmr edir. Və bu gün 20 mindən çox şəhid verən Azərbaycan öz müstəqilliyini, ərazi bütövlüyünü təmin etmək üçün bir daha düşmənlə mücadilədə Şəhidlər verməyə hazır olduğunu bəyan edir.

 

Azərbaycan insanı bu gün Qarabağ torpağında müharibə yaradıb, onun başını aşağı əyməyə çalışan beynəlxalq güclərə 101 yaşlı tarixi keçmişini xatırladaraq, müstəqil dövlətin azad bayrağını torpaqları işğaldan azad olunan bütöv Azərbaycanın üzərində dalğalandıracağını bəyan edir.

 

Bu gün Azərbaycan insanı məhz Məhəmmədəmin ideyalarına, mücadiləsinə güvənərək 101 il əvvəl onun səsləndirdiyi sözləri ürəyinə və beyninə “yazaraq” deyir:

 

Sən bizimsən, bizimsən,
durduqca bədəndə can,
Yaşa, yaşa, çox yaşa,
Ey şanlı Azərbaycan!

Xəbər lenti

InvestAZ

Ən çox oxunan xəbərlər

“Qocalmadan problemi həll etmək istəyirsinizsə, mənim hakimiyyətə gəlməyimə sizlər də yardımçı olun” - MÜSAHİBƏ-3

MÜBARİZ MƏNSİMOVUN SUÇU

 

 

“Bu, düz bağırsaqda bədxassəli şişin yaranma riskini 9 % artırır”

Restoran və kafelərdə siqaret çəkənlərə ağlasığmaz CƏRİMƏ

Müəllimlərin işə qəbulu üzrə vakansiya seçimi mərhələsi yekunlaşıb

AXH Qurultaya hazırlaşır

AXH: Hakimiyyətdən bu cür siyasətinə son qoymasını tələb edirik

5 addımda arıqlama

Kənddə qulyabani ovu: həmin “naməlum varlıq” bu dəfə Çiyni sakinlərini “təqib edir” - FOTO

Ermənilər mövqelərimizi atəşə tutdu

"Asma körpü"nün bərpasi ücün rayon rəhbərliyinə müraciət edirəm

Azərbaycanın hərbi qulluqçuları Moskvada mükafatlandırılıb

Qənirə Paşayeva Kamerun, Nigeriya və Konqonun qadın nazirləri ilə görüşüb

Millət vəkilinin tanınmış qadın siyasətçiləri, QHT, KİV, təşkilat rəhbərləri ilə görüşü davam edir

Ulu öndər Heydər Əliyevin yaxın dostu Osman Gezekerin ailəsi Azərbaycana təşəkkür etdi