AXCP sədri hökumətə, ölkə rəhbərliyinə müraciət etdi

"Dünyasını dəyişən Qarabağ qazisinin həyat yoldaşı və qızı çarəsiz durumdadılar. Tarix bağışlamayacaq..."

Versus.Az-ın məlumatına görə, bunu qazinin ailəsi ilə görüşdə AXCP sədri Razi Nurullayev deyib. AXCP sədri özünün "Facebook" səhifəsində yazır:

"Qarabağ müharibəsində birinci qrup əlilə çevrilən, sonra isə çox yaşaya bilməyib Allahın rəhmətinə qovuşan bir atanın qızı olan Nuranə Hüseynovanı və onkoloji xəstəlikdən əziyyət çəkən anasını ziyarət etdim. Kirayədə yaşayan bu ana və bala çətinlik içərisindədir, aylıq kirayəni belə, ödəməkdə çətinlik çəkirlər. Çünki bizim analoqsuz, pulsuz, dövlət hesabına olan səhiyyəmiz onların bütün müavinətlərini və edilən köməkləri "udur". 160 manat pensiya alan ana, bir dərmanına görə 700 AZN ödəməlidir. Bəs o qızın torpaq uğrunda vuruşan atası niyə ölüb? Ölüb ki, arvadı və qızı insaflı insanlardan yardım ala-ala dolansınlar?"

Razi bəy bildirib ki, anasının və Nuranə Hüseynovanın tam müalicəsini və təminatını dövlət üzərinə götürməlidir. Nuranə xanım da hər iki ayağından əməliyyat olunmalıdır. Anasının başına bir iş gəlsə, bu əlil qız küçələrdə yaşamalı olacaqmı:

"Mən hökumətə, ölkə rəhbərliyinə müraciət edirəm ki, bu ailənin və yüzlərlə bu kimi ailələrin problemləri birdəfəlik dövlət hesabına, neft pullarının hesabına həll edilsin. Dövlət deyirsə ki, imkanım yoxdur, qoy oğurlanıb xaricə çıxarılan milyardları qaytarsın və onu çıxaranları həbsə göndərsin. Qoy bu gün də dövlət büdcəsini oğurlayanları dayandırsın və dövlətin öz vəsaiti ilə bu xalqın problemlərini həll etsin.

Bütün xeyriyyəçilər bir yerə yığılsa belə, bu xalqın kasıblarının, şəhidlərinin, əlillərinin problemini həll etməyə gücü çatmaz. Bu, dövlətin qayğısı və gücü daxilindədir".

SEVDA
Versus.Az