Maraqlı Yeni İl oldu

Aliyə Abdurazakova

Salam. Öncəliklə mənim yazılarımı oxuyan hər birinizin yeni ilini təbrik edirəm. Bu dəfə mən Aliyə Abdurazakova sizlərə Yeni İli necə keçirməyim haqda danışmaq istəyirəm.

2018-ci il Rusiyada 11 dəfə qarşılandı. Çünki Rusiyanın şəhərləri arasında 11 saat fərqi var. Biz yaşadığımız Novosibirsk şəhərində yeni il Rusiyanın paytaxtı Moskvadan 4 saat öncə qarşılandı.

Mən yeni ili həm sinif yoldaşlarımla, həm də rəqs qrupumuzla birgə keçirdim. Sinif yoldaşlarımla yeni il karnavalında konkurslar keçirdik, bizə müxtəlif fokuslar göstərdilər. Rəqs qrupumuzla birgə meşəyə gəzintiyə getmişdik. Biz orada uşaqlarla iki komandaya bölünərək müxtəlif oyunlar oynadıq, hündür buz qorkasından sürüşdük. Həmin gün havanın çox şaxtalı olmasına baxmayaraq uşaqlarla birgə xeyli əyləndik və mənim rəqs qrupumuzla olan gəzinti daha çox xoşuma gəldi.

Rusiyada yeni il bayramından sonra "rojdestvo"nu qeyd edirlər. Müəlliməmiz qış tətilinə çıxmamışdan əvvəl bizə yeni ildən sonra "rojdestvo", daha sonra isə "starıy novıy qod" haqda danışanda bu bayramların nə vaxt qeyd olunduğunu soruşdu. Sinifdə təkcə mən "rojdestvo"nun 7 yanvarda qeyd olunduğunu dedim. Müəlliməm isə uşaqlara dedi ki, görürsünüz, Aliyəgil bu bayramı keçirmirlər, amma Aliyə "rojdestvo" nə vaxtdır bilir. "Starıy novıy qod" isə 13 yanvarda qeyd olunur.

Hə, bir də unutmadan, mənim yazılarımı öz saytlarında dərc edən Versus.Az jurnalistlərinin, xüsusilə də Arzu xalanın Yeni ilini təbrik edirəm.