YENİ CAZ MƏKANI AÇILDI

Tanınmış estrada və caz ifaçısı Təranə Mahmudova POLİFONİYA adlı yeni caz klubunu təqdim edib.

Versus.Az-ın məlumatına görə, təqdimatda tanınmş musiqiçilər, müğənnilər, aktyorlar, media nümayəndələri və müğənninin yaxın dostları iştirak edib. Bunların arasında Flora Kərimova, Bəhram Bağırzadə Rahib Azəri, Ənvər Sadıxov, Salman Qəmbərov və digərləri var idi.

Yeni açılmış klubu qonaqlara Rahib Azəri təqdim etdi. Bakıda Caz Festivallarının və caz ifaçılarının konsertləri tez-tez keçirilir. Hər janrın pərəstişkarı olduğu kimi, Bakıda caza da pərəstiş edən az deyil. Və dünya səhnələrini fəth edən caz ifaçılarımız da az deyil. Bu şəhər elə əvvəldən də cazla bağlı olub.

İlk caz kollektivi Bakda hələ XX əsrin 30-cu illərinin sonunda maestro Niyazi və bəstəkar Tofiq Quliyev tərəfindən yaradılmışdır. Ötən əsrin ortalarında siyasi dalğalı küləklər bu janrı dağa-daşa salsa da, cazsevərlər bu janrı SSRİ məkanında, sonra da hərə öz respublikasında bacardığı qədər inkişaf etdirdilər.

Təranə Mahmudova ən böyük arzularından birinin yerinə yetirilməsindən danışaraq qeyd etdi ki, Bakıda jaz klublarının daha da çox açılmasını istəyir.

Təqdimat zamanı canlı caz musiqisi səsləndi. Və, təbii ki, Təranə xanım özü də bir neçə caz parçaları ifa etdi.

Ayəndə Dadaşova
Versus.Az