Razi Nurullayev: “İranda Azərbaycan türkcəsində dərslərin keçirilməsi qərarını alqışlayıram”

“İranda Azərbaycan türkcəsində dərslərin keçirilməsinə icazə verilməsi gözəl addımdır və bunu alqışlayırıq”.

Versus.Az-ın məlumatına görə, bunu açıqlamasında AXCP sədri Razi Nurullayev bildirib. Partiya sədri qeyd edib ki, son zamanlar İran İslam Respublikasında normal hadisələr baş verir. O, gələcəkdə daha gözəl islahatların da şahidi olacağımıza inanmaq istədiyini vurğulayıb:

“Son iki ayda ora səyahət edən blogerlərin, Tv-lərin onlarla sənədli filmlərinə baxmışam. Bir videoda belə Azərbaycan adı, orada yaşayan soydaşlarımızla bağlı kiçik bir xatırlatma da yoxdur. Amma başqa kiçik xalqlardan bolluca danışılır. Məndə belə fikir yaranıb ki, onlar çəkilişə icazə alanda Azərbaycan türklərinin tarixi, yaşayışı barədə danışmamaq barədə öhdəlik alınır. Necə olur ki, işğalçı qonşumuz haqqında danışılır, hansı ki, onların bu coğrafiyada heç bir xidmətləri yoxdur. İran dövlətinin yaranmasında, inkişaf etdirilməsində və bu gün də dövlətçiliyi çiyində daşımaqda farslarla bərabər məhrumiyyətlər çəkən soydaşlarımızın adının çəkilməməsi, onlara qadağalar tətbiq edilməsi, televiziya çəkilişlərində bu xalqın adının çəkilməsinə qadağa qoyulması necə ədalətli ola bilər? Ümid edək ki, bu tip məsələlər də yaxınlarda ədalətli həllini tapacaqdır”.

SEVDA
Versus.Az