Fuad Əliyev: "Zəngəzur dəhlizinin açılması qərarında geriyə dönüş yoxdur"

“Türkiyə prezidenti Rəcəb Tayyib Ərdoğanın Azərbaycana səfəri onu göstərdi ki, iki ölkə arasında əməkdaşlıq uğurla davam edir. Mənim fikrimcə qardaş Türkiyə ilə olan əməkdaşlıq sarsılmazdır”.

Versus.Az xəbər verir ki, bunu prezidentliyə eks-namizəd, Müstəqil Həmkarlar Birliyinin (MHB) sədri Fuad Əliyev Türkiyənin prezidenti Rəcəb Tayyib Ərdoğanın Azərbaycana səfəri ilə bağlı açıqlamasında bildirib.

Prezidentlərin çıxışlarına diqqət çəkən Fuad Əliyevin sözlərinə görə, onlar öz çıxışlarında Şuşa Bəyannməsinin regionda sülh və sabitliyin təminatı olduğunu bir daha bəyan etmiş oldular:

"İlham Əliyev və Rəcəb Tayyib Ərdoğanın həm Şuşa Bəyannaməsi, həm də, 9 noyabr 2020-ci ildə imzalanan üçtərəfli bəyannamədə, regionda nəqliyyat-kommunikasiya əlaqələrinin bərpa edilməsi, Zəngəzur dəhlizinin açılması qeyd edilib. Bunu geopolitik və geoiqtisadi layihələrin reallaşdırılması diqtə edir”.

Fuad Əliyev Prezident İlham Əliyevin Zəngəzur dəhlizi ilə bağlı fikirlərini də münasibət bildirdi:

“Prezidentin çıxışından da tam aydın görünür ki, İlham Əliyev Zəngəzur dəhlizinin açılması ilə qətiyyətli davranmaq niyyətindədir. Geriyə dönüş yoxdur. Türkiyə prezidenti də öz çıxışında bir daha Zəngəzur dəhlizi məsələsində Azərbaycana tam dəstəyini ifadə etdi”.

SEVDA
Versus.Az