Ziyalılar Quba Soyqırımı Memorial Kompleksini ziyarət ediblər

17:35 01-04-2018 | 615 | Qarabağ

XX əsrin ən dəhşətli faciələrindən biri 1918-ci il martın 30-dan aprelin 3-dək olan dövrdə Azərbaycanın bir çox şəhər və rayonlarında baş verib. Erməni daşnaklarının lideri Stepan Şaumyanın rəhbərliyi altında fəaliyyət göstərən silahlı erməni terrorçuları dinc əhaliyə divan tutdular.

Azərbaycanın paytaxtı Bakı şəhərində, Bakı quberniyasının müxtəlif bölgələrində, eləcə də Şamaxı, Quba, Xaçmaz, Lənkəran, Hacıqabul, Salyan, Zəngəzur, Qarabağ, Naxçıvan və digər ərazilərdə Bakı Soveti və Daşnaksütundan olan erməni silahlı dəstələrinin azərbaycanlılara qarşı törətdikləri qırğınlar zamanı 12 minə yaxın (qeyri rəsmi məlumatlara görə 30.000 nəfər) azərbaycanlı qətlə yetirilmiş, on minlərlə insan itkin düşmüşdür.
Azərbaycanın sabiq Dövlət Başçısı, Ümumilli lider Heydər Əliyevin 26 mart 1998-ci il tarixli Sərəncamı ilə 31 mart - azərbaycanlıların soyqırımı günü kimi qeyd olunur.

Versus.az-ın məlumatına görə, martın 31-də Abşeron rayon Təhsil şöbəsinin əməkdaşları, bu rayonun ərazisində fəaliyyət göstərən orta ümumtəhsil məktəblərinin nümayəndələri, habelə, ictimaiyyət nümayəndələri Quba Soyqırımı Memorial Kompleksini ziyarət etdilər.

Abşeron rayon Təhsil şöbəsinin və Xırdalan şəhərində fəaliyyət göstərən "Ulduz" Kurslarının birgə təşkilatçılığı ilə baş tutan anım mərasimində rayon Təhsil şöbəsinin müdiri Nazilə Məmmədova, "Ulduz" Kurslarının direktoru Ruslan Əliyev, Xocalı şəhər 2 nömrəli tam orta məktəbinin direktor əvəzi, Azərbaycanın Milli Qəhrəmanı Füzuli Rüstəmovun bacısı Fiqurə Rüstəmova, Cəbrayıl rayonundakı Cocuq Mərcanlı kənd tam orta məktəbinin direktoru Zamin Həziyev, "Xocalı Soyqırımını Tanıtma" ictimai birliyinin sədri, "fact-info.az"və "xebertv.az" saytlarının redaktoru, "Tərəqqi" medalının mükafatçısı Şamil Sabiroğlu, "Qafqaz-media" İctimai Birliyinin sədri, "Qafqaz press" adlı saytın və "Borçalı" qəzetinin baş redaktoru Hacı Azadə-Taleh Abbasqızı və başqaları iştirak ediblər.