“Böyüyəndə əsgər olacam”

Bu gün Aprel şəhidimiz gizir Rahim Tağıyevin oğlunun doğum günüdür.

Versus.Az xəbər verir ki, əməkdaşı təbrik üçün şəhidimizin xanımı Vüsalə Tağıyeva ilə əlaqə saxlayıb.

Qeyd edək ki, şəhidimiz 3 övladını vətənə yadigar qoyub. Bu gün onun balaca oğlu Nicatın ad günüdür.

Nicat bildirib ki, doğum gününü dostları ilə qeyd etməyi sevir.

“Bu gün mənim on yaşım tamam olur. Ad günümü dostlarımla keçirməyi sevirəm. Ən böyük arzum məktəbi bitirib universitetə qəbul olmaqdır. Ən xoşladığım dərs isə həyat bilgisi və tarix fənnidir. Mən böyüyəndə polis olmaq istəyirəm. Ən əsası isə mən əsgər olacam”.

Şəhidin xanımı da oğlu ilə bağlı arzularını bizimlə bölüşüb:

“Hazırda Nicatın oxuduğu məktəbin müəllimləri onun ad gününü qeyd edirlər. Bu onun üçün sürpriz oldu. Ümumiyyətlə, Nicatın bu ilki doğum günü bir başqa oldu”.

Vüsalə xanım qeyd edib ki, Prezident tərəfindən onlara ev verilməsi, bu gün müəllimlərinin Nicata ad günü sürprizi oğlu və özü üçün böyük hədiyyədir:

“Sağ olsunlar ki, Nicatı sevindirdilər. Bu gün oğlumun sevincinin həddi-hüdudu yoxdur. Nicat polis olmaq istəyir, böyük oğlum Nihat isə hərbçi. Seçdikəri peşəyə heç vaxt qarışmaram. Təki təhsilli,vətənə layiqli övlad olsunlar. Arzum budur ki, üçü də atalarının adını daim yaşadan, uca tutan övlad olsunlar”.