Uşaqlar xəstə olmasın!..

Leyla Nəcəfli

Salam əziz oxucular. Bu gün bir uşağın mənim ürəyimdə necə bir acı hiss yaratmasından danışacam…

…Bu gün anam məni ad günüm münasibətilə parka gəzməyə aparmışdı. Parkda xoşbəxtcəsinə oynayırdım, hər şey super idi. Adamlar çox idi. Uşaqlar oynaşır, böyüklər isə gəzişirdilər, oturacaqlarda əyləşənlər də var idi.

Diqqətimi oturacaqlardan birinin yanında dayanan uşaq arabası çəkdi. Heç nəyə fikir vermədən onunla oynamaq istədim. Beşikdə balaca bir qız uzanmışdı. Anası onu təmiz hava almağa gətirmişdi. Çox şirin qız idi, onu oynatmaq istədim. Ancaq qız heç cür mənə səs vermədi, tərpənmədi də…

Sonra anamdan bunun səbəbini soruşdum. Anam uşağın xəstə olduğunu dedi. Mən çox kədərləndim. Anama dedim ki, axı o uşaq soyuq su içməyib, dondurma yeməyib nədən xəstələnib? Çünki mən həmişə elə bilirdim ki, uşaqlar yeni doğulduqları üçün onlar təmiz və sağlam olurlar. Xəstəliklər sonra gəlir… Amma belə deyilmiş…

Anam bəzən uşaqların elə ana bətnində xəstə olduğunu, doğulandan sonra əziyyət çəkdiyini dedi. Bu barədə anama çox suallarım oldu…

İndi o uşaq ağlımdan çıxmır. Hər dəfə azan oxunanda Allahıma dua edirəm ki, uşaqlar xəstə olmasınlar. Xəstə uşaqların valideynlərinin və hətta körpələrin də necə əziyyət çəkdiyini dillə demək olmur.

Axı bu uşaqların günahı nədir ki, xəstə doğulurlar?!

Fikirlərşəndə ki, bu uşaqlar iməkləməyəcək, yeriməyəcək, tay-tuşları ilə oynamayacaq, məktəbə getməyəcəklər… Çox kədərlənirəm… Məncə hər bir ana, ata istəyər ki, övladı ilə fərəh duysun, hamının yanında onu tərifləsin, onunla oynasın, gülsün…

Kaş hər yerdə elə həkimlər olsun ki, bel uşaqları müalicə edə bilsinlər, uşaqlar bu dünyaya sağlam gəlsinlər və ölkəmizdə sağlam insanların sayı çoxalsın.

Müəllimimiz həmişə deyir ki, bu günün uşaqları gələcəyin əsgəri, həkimi, müəllimi, memarı olur. Böyüklər bizə “siz bizim gələcəyimizsiniz”- deyirlər. Amma belə də olurmuş…

Əziz böyüklərimiz gələcəyimizi qoruyun, elə edin ki, uşaqlar xəstə olmasınlar!..