“Onun namizədinin prezident olacağı şübhə doğurmur”

“Partiya üzvlərimiz seçki günü hansı namizədə istəsələr səs verə bilərlər”

Bunu Versus.az-a Ədalət Partiyasının sədr müavini Mütəllim Rəhimli prezident seçkisində namizədlərdən kimə dəstək verəcəkləri ilə bağlı  açıqlamasında bildirib:

“Biz bu məsələni Ali Məclisin iclasında müzakirə etmişik. Ədalət Partiyası seçkilərdə iştirak etməmək haqqında qərar qəbul edib. Bununla belə hər kəs istədiyi namizədə səs verə bilər”.

M.Rəhimli bildirib ki, seçkilərin demokratikliyi təkcə seçki günü ilə ölçülə bilməz. Bütöv seçki prosesi nəzərə alınmalıdır:

“Müşahidələr göstərir ki, bu proses kifayət qədər açıq, şəffaf və bütün iddiaçılar üçün eyni şəkildə əlçatan olmadı. Ona görə də bir sıra iddialı və cəmiyyətdə kifayət qədər nüfuza malik iddiaçılar seçkilərə qatılmadılar”.

M.Rəhimli hesab edir ki, seçkilərdə kimin şanslı olması məsələsini dəyərləndirmək mümkün deyil:

“Hakimiyyət çox güclüdür, bütün prosesə nəzarət edir və onun namizədinin yenidən prezident olacağı şübhə doğurmur”.

TAHİRƏ
Versus.Az