Yarımfinalçılar müəyyənləşdi

Naxçıvan şəhərində keçirilən kişilər arasında şahmat üzrə Azərbaycan çempionatının ilkin mərhələsi sona çatıb. Yarışın əsasnaməsinə görə, ilk dörd yeri tutan şahmatçı final mərhələsinə vəsiqə qazanıb.

 

Versus.Az xəbər verir ki, hərəyə 7 xal toplayan Vasif Durarbəyli və Misrətdin İsgəndərov 1-2-ci yerləri bölüşdürüb. Əlavə göstəricilərə görə Vasif Durarbəyli birinci yerin sahibi olub. Aydın Süleymanlı 6 xal ilə 3-cü yeri tutub.

Hərəyə 5.5 xal toplayan Məhəmməd Muradlı, Eltac Səfərli, Murad İbrahimli və Əhməd Əhmədzadə 4-7-ci yerlərdə qərarlaşıb. Əlavə göstəricilərə görə 4-cü yerə layiq görülən Məhəmməd Muradlı final mərhələsinə vəsiqəni təmin edib. Beynəlxalq qrossmeyster Eltac Səfərlinin yarımfinala vəsiqə qazana bilməməsi sürpriz olub.

 

Çempionatda iki şahmatçı – Xəzər Babazadə və Uğur İlyaslı beynəlxalq usta normasını yerinə yetirib.

 

Beləliklə, yarımfinalda Vasif Durarbəyli Məhəmməd Muradlı ilə, Misrətdin İsgəndərov isə Aydın Süleymanlı ilə qarşılaşacaq.

 

Final mərhələsi 15-18 fevral tarixlərində keçiriləcək.

 

Qeyd edək ki, final mərhələsi “İdman” telekanalı ilə şərh olunacaq. Partiyaları beynəlxalq qrosmeyster, gənclərdən ibarət yığmanın baş məşqçisi Fərid Abbasov və beynəlxalq qrosmeyster Nicat Abbasov şərh edəcək.