"Taleyimizi ingilis jurnalı təyin edə bilməz"

Türkiyə prezidenti Rəcəb Tayyib Ərdoğan "The Economist" nəşrinin üz qabığında Türkiyədəki seçkilər barədə təsvirə münasibət bildirib.

Versus.az "TRT Haber"ə istinadən xəbər verir ki, Ərdoğan bu barədə cümə namazından çıxarkən danışıb.

"İndi siz türk mediasına mənsub olanlar kimi "The Economist"in şərhinə "hə" deyirsiniz? Yəni millətiin taleyini onlar təyin edir? Mənim millətim təyin edir. Millət nə desə, Türkiyədə o olur. Türkiyənin taleyini ingilis jurnalı təyin edə bilməz", - deyə o söyləyib.

Seçkilər mövzusuna da toxunan Türkiyə prezidenti müxalifətin 14 may tarixindən danışmasını xeyirli əlamət adlandırıb: "Səlahiyyətin kimdə olduğunu bilməyən cahillərlə üz-üzəyik. Türkiyənin prezidenti Ərdoğandır. Konstitusiyada səlahiyyətlər bəllidir. 60 gün əvvəl seçki elan oluna bilər".

Ərdoğan Yunanıstanı razılaşmalara uyğun olmayan addımlardan çəkinməyə çağırıb.

Qeyd edək ki, "The Economist"in üz qabığında Ərdoğan əleyhinə təsvir yer almışdı.