Məhəmməd Əsədullazadə: “Bu müsahibə mesaj verdi ki, Azərbaycan xarici siyasətini inamla davam etdirəcək”

“Prezident Azərbaycan televiziyasına verdiyi müsahibədə 2024-cü ilin prioritetini ortaya çıxartdı”.

Versus.Az xəbər verir ki, bunu açıqlamasında siyasi şərhçi Məhəmməd Əsədullazadə bildirib.

Ekspert eyni zamanda Prezidentin Ermənistanla Azərbaycan arasında sülh prosesində atılan addımlar, Ermənistanın silahlandırılmasına Azərbaycanın ciddi şəkildə cavab verəcəyi, Zəngəzur dəhlizi ilə bağlı Ermənistan və havadarlarına xüsusi mesajlar verdiyini önə çəkib:

“Sülh prosesi üçün ciddi siyasi iradə var. Düşünürəm ki, bu il sülh müqaviləsinin bağlanması reallaşa bilər. Eyni zamanda Prezident qeyd etdi ki, Fransanın Ermənistanı silahlandıraraq onu müharibəyə sürükləməsi sülh prosesini müəyyən dərəcədə təhdid edir. Azərbaycan xalqına mesaj verdi ki, qəti şəkildə arxayın olmaq olmaz, bir olmaq, güclü olmaq lazımdır”.

M.Əsədullazadə bildirib ki, Prezident Ermənistanın sülh siyasətinə əmin deyil:

“Çünki Ermənistan müstəqil siyasət yürüdən ölkə olmayıb. Ermənistan Rusiyanın boyunduruğundan çıxsa da, hələ də Qərbin, Fransanın təlimatı ilə hərəkət edir”.

Ekspert, həmçinin Prezidentin məcburi köçkünlərin Xocalı, Şuşa, Xankəndi, Cəbrayıla qayıdışı prosesinin 2024-cü ildə uğurla həyata keçiriləcəyini vurğulayaraq, bununla bir növ dünyaya, region ölkələrinə ciddi mesajlar verdiyini deyib:

“Prezdent bununla bəyan etdi ki, Azərbaycan xarici siyasətini inamla davam etdirəcək. Azərbaycan təbii və strateji müttəfiqinin Türkiyə olduğunu, silah arsenalını inkişaf etdirdiyini, sərhədlərini qoruduğunu, Ermənistanla sülh prosesinə sadiq olduğunu bildirdi. Prezident Ermənistanın Zəngəzur dəhlizi ilə bağlı spekulyasiya edəcəyi halda blokadada qalacağını vurğuladı”.

M.Əsədullazadə hesab edir ki, Ermənistan bundan nəticə çıxarmalıdır. Ermənistan Zəngəzur dəhlizi ilə maneəsiz giriş-çıxışın təmin edilməsi istiqamətində Azərbaycanın təkliflərini qəbul etməlidir:

“Prezidentin dediyi sözlər, fikirlər reallığı əks etdirir. Ermənistan tərəfindən 2024-cü ildə sülh prosesində, Zəngəzur dəhlizinin açılmasında real addımlar atılmasa blokadada qalacaq”.

LƏMAN