Əməkdaşı ölümlə hədələnən Birlik hərəkətə keçdi

13:00 27-06-2023 | 693 | Cəmiyyət

Müstəqil Həmkarlar Birliyinin Mətbuat Xidməti Birliyin əməkdaşının ölümlə hədələnməsi ilə bağlı Bəyanat yayıb.

Vətəndaş Mehriban Mirzəyevaya məxsus Binəqədi rayonunda yerləşən 5 sot torpaq sahəsi qonşusu tərəfindən zəbt olunub.

Versus.Az xəbər verir ki, bu barədə Mehriban Mirzəyeva tərəfindən Müstəqil Həmkarlar Birliyinə daxil olan müraciətdə bildirilib.

Binəqədi bələdiyyəsinin memarı, Mehriban Mirzəyeva və Müstəqil Həmkarlar Birliyinin sədr müavini Xəzər Teyyublu Birliyə daxil olan şikayətin araşdırılması üçün ərazidə olublar. Mehriban xanıma məxsus olan torpaq sahəsinə baxış keçirmək üçün torpağı zəbt edən qonşu Əli Ramin oğlu Musayevə zənq edərək qapını açması xahiş olunub. Vətəndaş Əli Musayev MHB sədrinin müavini Xəzər Teyyubluya söyüş və hədə-qorxu gələrək qapını aşmasından imtina edib.

Daha sonra, axşam saatlarında Etibar Cəmalov vətəndaş Mehriban Mirzəyevaya zənq vuraraq torpaq sahəsini zəbt edən Əli Musayevi narahat etməməsini bildirərək, nəlayiq ifadələr işlədib, hədə-qorxu gəlib, “ora bir kişi gəlsə onun meyiti orda qalacaq” -deyə, ölümlə hədələyib.

Müstəqil Həmkarlar Birliyinin Mətbuat Xidməti bildirir ki, Əli Musayev və Etibar Cəmalovla bağlı Azərbaycan Respublikası Daxili İşlər naziri Vilayət Eyvazova müraciət olunacaq.

AYSEL
Versus.Az