Füzuli aeraportunun hərbi məqsədlər üçün istifadə edilməsini zəruri edən səbəblər...
“Füzuli Beynəlxalq Hava Limanının açılışına Türkiyə Prezidenti Rəcəb Tayyib Ərdoğanın gəlməsi hava limanının həm türk dünyası, həm də region üçün nə dərəcədə əhəmiyyətli olduğunu bir daha sübut etdi. Füzuli hava limanı bütövlükdə Qarabağın bərpası, gələcək perspektivdə isə regiona investisiya, turistlərin cəlb edilməsi baxımdan vacibdir. Lakin təkcə humanitar, iqtisadi, siyasi baxımdan deyil, hərbi baxımdan da Füzuli aeroportu kifayət qədər strateji əhəmiyyətə malikdir”.
Bunu Versus.az-a politoloq Turan Rzayev Füzuli Hava Limanının əhəmiyyəti ilə bağlı şərhində deyib.
Politoloq hesab edir ki, Füzuli Hava Limanından hərbi məqsədlər üçün istifadə edilə bilər.
“Nəzərə almaq lazımdır ki, hava limanında hələ əlavə işlər görüləcək və yeni uçuş zolaqları əlavə ediləcək. Bu uçuş zolaqları niyə məhz hərbi təyyarələr üçün nəzərdə tutulmasın?
Digər bir nüans da Azərbaycanın uzun müddətdir hərbi hava qüvvələrini yeniləmək, islahatlar aparmaq istəyidir. Bu istiqamətdə yaxın aylarda hərbi hava qüvvələrinə yeni döyüş təyyarələri alına bilər. Füzuli hava limanının istifadəyə verilməsi və hərbi hava qüvvələrinə yeni döyüş təyyarələrinin alınması onu deməyə əsas verir ki, Füzuli hava limanının hərbi məqsədlər üçün istifadə edilməsi planlaşdırılır”.
T.Rzayev prinsip etibarilə bunu mümkün hesab edir.
“Dünya təcrübəsində də belə nümunələr var. Türkiyənin müxtəlif bölgələrində yerləşən hava limanlarında xüsusilə hərbi helikopterlər və döyüş təyyarələri üçün yerlər var. Bu hava limanının təhlükəsizliyi ilə yanaşı, ölkənin müxtəlif regionlarına və ölkə daxili hərbi əməliyyatlarda hava dəstəyi təmin etməyə imkan yaradır. Füzuli aeroportunda da bunu etmək olar. Nəzər alsaq ki, yekun sülh müqaviləsi hələ ki, imzalanmayıb və Qarabağda sepratçılar var. Bu hələ bir müddət regionda gərginliyin artma ehtimalını aktual olaraq saxlayır. Gələcəkdə baş verə biləcək ehtimal erməni təxribatına qarşı Füzuli aeroportundan həm də hərbi məqsədlər üçün istifadə etmək lazımddır.
Füzuli aeroportunun hərbi məqsədlər üçün istifadə edilməsini zəruri edən digər məsələ də Şuşadır. Belə ki, hava limanı ilə Şuşa arasında cəmi 100 kilometr məsafə var. Bu, gələcəkdə Şuşaya ediləcək istənilən hərbi təxribatın qarşısını almaq üçün ideal məsafədir. Yəni Füzuli hava limanından qalxan döyüş təyyarələri Ermənistanın və separatçıların ehtimal təhdidlərininin qarşısını vaxtında ala bilər. Bu, həm də Azərbaycan Ordusunun Qarabağda manevr imkanlarını gücləndirir.
Füzuli hava limanının hərbi məqsədlər üçün istifadə edilməsi həm də Rusiya sülhməramlılarına nəzarət baxımından vacibdir. Məsələ ondadır ki, hazırda Rusiya Müdafiə Nazirliyi Qarabağa yükü Ermənistan üzərindən daşıyır. Bu isə öz növbəsində həmin yüklərin tərkibi, nə məqsədlə aparılması kimi problemlər yaradır. Yüklər Füzuli hava limanından da daşına bilər. Hətta bu Kremldən tələb edilməlidir. Azərbaycan ərazisinə yüklər Azərbaycan ərazisindən aparılmalıdır. Bu zaman Azərbaycan Füzuli Hava Limanından ermənilərin yaşadığı əraziyə daşınan yüklərə nəzarət imkanı əldə edə biləcək”.
Tahirə Qafarlı
Xəbər lenti
Həftəsonu qitənin yaşıl meydanlarında FUTBOL HƏYƏCANI
Avropanın yaşıl meydanlarında bir-birindən maraqlı...