“Azərbaycanın İncisi Şuşa” - Reza Deqatinin foto-sərgisi

8-9 dekabr 2022-ci ilin “Türk Dünyasının mədəniyyət paytaxtı” Bursa şəhərində Beynəlxalq Türk Mədəniyyəti və İrsi Fondu və Bursa Böyükşəhər Bələdiyyəsinin birgə əməkdaşlığı çərçivəsində “Şuşa Günləri” keçiriləcəkdir.

Versus.Az xəbər verir ki, proqramda dünyaca məşhur fotoqraf Reza Deqati tərəfindən Qarabağ mədəniyyətini əks etdirən “Azərbaycanın İncisi Şuşa” foto sərgisinin nümayişi olacaqdır. Sərgidə fotoqrafın Şuşada işğaldan əvvəl və sonra çəkdiyi fotoşəkillər göstəriləcək.Xatırladaq ki, 1992-ci ildə işğala az qalmış şəhəri tərk edən Reza Deqati 30 ildən sonra qayıdaraq Şuşanı yenidən kameranın yaddaşına köçürüb.

Qeyd edək ki, Deqati sərgisinin açılışı üçün Bursadadır və tədbir zamanı eyni zamanda əyani konfrans keçirəcək və Şuşanın keçmişindən, indiki təcrübələrindən və gələcəyi ilə bağlı arzularından danışacaq.

2023-cü ilin “Türk Dünyasının mədəniyyət paytaxtı” seçilən Şuşa şəhəri tarixən Azərbaycanın mədəni-mənəvi, ictimai-siyasi həyatının mühüm mərkəzlərindən biri olmuşdur. Fondun təşəbbüsü ilə Bursada “Şuşa Günləri”nin təşkil olunması, “Türk Dünyasının mədəniyyət paytaxtı” statusunun bir şəhərdən digərinə ötürülməsi üzrə yeni bir ənənənin əsasının qoyulması məqsədini daşımaqdadır.

“Şuşa Günləri”nin rəsmi hissəsində Beynəlxalq Türk Mədəniyyəti və İrsi Fondunun prezidenti Günay Əfəndiyevanın, Bursa Böyükşəhər Bələdiyəsinin Başçısı Alinur Aktaşın, Azərbaycan və Türkiyə rəsmilərinin, Türk Əməkdaşlıq Təşkilatlarının rəhbərlərinin iştirakı və çıxışları nəzərdə tutulur.

Versus.Az