Müşfiq Ələsgərli: "İnformasiya Agentliyinin təqdimatı "çayxana söhbəti" səviyyəsində olmamalıdır"

""Turan" İnformasiya Agentliyi belə davranışla təkcə özünə qarşı olan etimadı zədələmir, həm də ümumilikdə çox zərərli tendensiya yaradır".

Versus.Az xəbər verir ki, bunu "Turan" İnformasiya Agentliyinin "İlham Əliyev baş nazirin iki xoşagəlməz müavinini qovub" sərlövhəli məqaləsinə açıqlamasında Mətbuat Şurasının sədr müavini Müşfiq Ələsgərli bildirib:

"Ölkə Prezidentinin sərəncamını kontekstdən çıxarmaq, onu məzhəkə obyektinə çevirmək nə anlama gəlir? "Prezident baş nazirin iki xoşagəlməz müavinini qovdu" nə deməkdir? İnformasiya Agentliyinin təqdimatı "çayxana söhbəti" səviyyəsində olmamalıdır. Agentliyin imicinə hörmət qoymursan, özün bilərsən, amma ölkənin birinci şəxsinin imzaladığı sərəncamı məzhəkəyə çevirməyin adı nədir? Rəsmi sərəncam olub, hər kəs televiziya kanallarında baxıb və görüb ki, Prezident İlham Əliyev Əli Həsənovu və Hacıbala Abutalıbovu necə yola salıb. Hər kəsin gördüyü, Prezidentin sərəncamında əks olunan faktın bu formatda təqdimatı təkcə qeyri-peşəkarlıq göstəricisi deyil, məncə. Təhlükəli, zərərli bir oyunun simptomları görünür. Bir il öncə "Prezident yanında təhlükəsizlik şurasının toplantısından" dan "sızan xəbərlər" aldığını deməklə gündəmə gələn Mehman Əliyev, deyəsən bu cür informasiyalarla gündəmə gəlməyi özünə xobbi seçib".

LƏMAN
Versus.Az