“Həmin partiyalar müstəqil deyil”

“Bəzi partiyalar qərar vermək üçün iqtidarın namizədinin kim olacağını gözləyirdi.  Bu da onu göstərir ki, həmin partiyalar müstəqil deyillər”.

Bunu Versus.Az-a Azərbaycan Liberal Demokrat Partiyasının (ALDP) sədri Fuad Əliyev YAP-ın öz namizədini açıqlayandan sonra bəzi müxalifət partiyalarının seçki namizədi ilə bağlı irəli sürdüyü qeyri-müəyyən, şübhəli yanaşmalarının aradan qalxacağı və seçki ilə bağlı aktivlik fazasının dəyişəcəyi ilə bağlı açıqlamasında bildirib.

“ALDP 2017-ci il aprelin 12-də prezident seçkisində iştrakla bağlı qərarını verib. Biz həmin tarixdən seçkilərə hazırlaşırıq. Əgər hakimiyyət öz namizədini irəli sürübsə, deməli bütün resurslarını işə salacaq. Ona görə də mən partiyaların seçkidə namizədlə iştirak etmələrində hər hansı qeyri-müəyyənlik, şübhəli nüanslar axtarmağın tərəfdarı deyiləm”.

F.Əliyev eyni zamanda  bildirib ki, YAP-ın öz namizədini bəyan etməsindən sonra da bəzi partiyaların seçkiyə yanaşmasında heç nə dəyişməyəcək:

“Hakimiyyət seçki dövründə daxili problemləri bir kənara qoyub monolit olmağı bacarır. Təəssüflər olsun ki, bu sözləri müxalifət üçün deyə bilmirəm. Partiya sədrlərinin “o kimdir mən olan yerdə”, “bu hakimiyyətə işləyir” iddiaları, “o bacarıqsızdır”- kimi yersiz yanaşmaları, nəticə etibarilə müxalifətin vahid mövqedən çıxış etməsinə imkan vermir”.

İlahə
Versus.Az