Könül İsmayılova: "O zaman peşəkar psixoloq kimdir, bəlli olacaq"

""Niyə boşanırsız? Ərim mənə bahalı, 3 minlik telefon almır”. Boşanmaların sayı günü-gündən artdığı ərəfədə bəziləri üçün bahalı telefon səbəb sayılacaq və buna görə ailəsini dağıdacaq”.

Bu sözləri açıqlamasında psixoloq Könül İsmayılova deyib. 

Psixoloq qeyd edib ki, bəzi psixoloqlar gündəmdə qalmaq üçün bilərəkdən insanlarda qıcıq yaradacaq ifadələr işlədir:

“Sosial şəbəkədə, mediada həmin psixoloqun səsləndirdiyi fikir bir neçə gün müzakirə olunacaq və beləliklə o, məşhurlaşacaq. Həmin ifadə ilə psixoloq özünü reklam etdi və bacardı da”.

Həmsöhbətimiz qeyd edib ki, bu gün ölkədə peşəkar psixoloq problemi yaşanır. Onun sözlərinə görə, ölkədə psixoloq çoxdur, ancaq peşakar, öz sahəsinin mütəxəssisi olduqca azdır:

“Ümumiyyətlə, psixoloqlar özbaşına bir sahədir, heç bir nəzarət yoxdur, alver, biznes, gəlir mənbəyi olub. Bəzi psixoloqların özlərinin müalicəyə ehtiyacı var. Onların fəaliyyəti cinayətdir. “Həyat yoldaşım 3 minlik telefon almırsa, boşanmaq kimi şansım var” fikri boşanmaların sayını artıracaq. Bəzi xanımlar bu ifadəni əlində “bayraq” edib boşanmaq üçün məhkəməyə üz tutacaq. Bu səbəbdən də hesab edirəm ki, psixoloqları da müəllimlər kimi sertifikasiya etsinlər. O zaman peşəkar psixoloq kimdir, bəlli olacaq”.