“II Beynəlxalq Rəsulzadə qiraətləri” - Muzeydə beynəlxalq konfrans

21:01 01-02-2024 | 329 | Mədəniyyət

Azərbaycan ictimai-siyasi və dövlət xadimi Məhəmməd Əmin Rəsulzadənin 140 illiyinin qeyd edilməsi haqqında Azərbaycan Respublikasının Prezidenti İlham Əliyevin Sərəncamına əsasən tədbirlər planı çərçivəsində 31 yanvar -1 fevral 2024-cü il tarixlərində Milli Azərbaycan Tarixi Muzeyində M.Ə.Rəsulzadənin 140 illiyinə həsr olunmuş “II Beynəlxalq Rəsulzadə Qiraətləri” adlı konfrans keçirilib.

Versus.Az xəbər verir ki, Konfrans Milli Azərbaycan Tarixi Muzeyi, Məhəmməd Əmin Rəsulzadə ev-muzeyi ictimai qrupu, Xəzər Universiteti, Varşava Universiteti Ankara Universiteti və ANS Şirkətləri Qrupunun təşkilatçılığı ilə baş tutub.

Konfransda Azərbaycan, Türkiyə, İsveç, İran, Polşa, Tatarıstan, Fransa, ABŞ, Almaniya, Ukraynadan alimlər, ictimaiyyət nümayəndələri, KİV nümayəndələri, muzey əməkdaşları iştirak ediblər.

Muzeydə iki gün davam edən konfransda Milli Azərbaycan Tarixi Muzeyinin direktoru, akademik Nailə Vəlixanlı, muzeyin elmi işlər üzrə direktor müavini, tarix elmləri doktoru, dosent Fərhad Cabbarov, professor Solmaz Rüstəmova-Tohidi və digər tədqiqatçı alimlər Azərbaycan Xalq Cümhuriyyəti tarixinin önəmindən, M.Ə.Rəsulzadənin fəaliyyətindən bəhs ediblər. Çıxışlarda M.Ə.Rəsulzadənin çoxşaxəli irsinin tədqiqinin və öyrənilməsinin davam etdirilməsi üçün belə konfransların keçirilməsinin zəruriliyi vurğulanıb.

Daha sonra konfrans təşkilatçıları tərəfindən M.Ə.Rəsulzadənin 1949-cu il 1 fevral tarixində Ankarada yaratdığı Azərbaycan Kültür Dərnəyinin 75-illiyi barədə ətraflı məlumat verilib.

Konfransın yekununda təşkilatçılar tərəfindən M.Ə.Rəsulzadə irsinin araşdırmaçılarına təşəkkür edilib və xatirə fotoları çəkilib.