Lüt videodan "çörək" - IP və layk - qazananlar

BƏYBALA MİRZƏYEV

Dünən sosial şəbəkələrdə Bakıda villalardan birindəki kef məclisində çılpaq qızların rəqs etməsini və mahnı oxumasını əks etdirən videonun yayılması adi, sıradan bir hadisə idimi?

Bir çox insanlarımız kimi mən də çox pis oldum ki, cəmiyyətimizdə bu cür pozğun kişiciklər və qadıncıqlar var, belə bir biabırçı hadisə baş verib. Üstəlik də bu rəzalət dolu videonu adi günlərdən birində yox, məhz 31 Mart Azərbaycanlıların Soyqrım Günü "YouTube"də yerləşdiriblər, yayıblar. Və ən pisi də budur ki, bəzi saytlar və sosial şəbəkə istifadəçiləri də bu videonu partapart paylaşdılar. Adını da qoydular ki, guya qınamaq məqsədilə paylaşıblar.

Bəli, ola bilər ki, onlar bunu hər hansı bir pis niyyətlə yox, əksinə, məhz xoş məramla, tərbiyyəvi məqsədlə paylaşıblar. Amma zəmanətimiz varmı ki, tərbiyə məqsədilə paylaşdıqlarımız əks-tərbiyə ilə nəticələnməyəcək? Kim qarantiya verir ki, şiddətlə qınadığımız, amma həm də paylaşdığımız bu və bu cür videolar yavaş-yavaş bir çox insanların abrını aradan aparmayacaq? Axı belə şeylər get-gedə insan üçün baxdıqca adiləşir və insanın ruhu ölür, mənəviyyatı zəifləyir, insan arsızlaşır...