Fuad Əliyev: "Ermənistanın Rusiyanın orbitindən qopmaq gücü yoxdur"

Ermənistan Cənubi Qafqazda Rusiyaya qarşı olduğunu, özünə yeni himayədar qismində Kremlin əvəzinə Qərbi seçdiyini getdikcə daha əyani surətdə, konkret əməlləri ilə təsdiqləyir. Bundan sonra Avropa İttifaqına üzv ölkələrin nümayəndələrinin mülki missiyasının daha uzun müddətə Ermənistan vasitəsilə regiona gəlişi Rusiyada daha ciddi qıcıq yaradacaq.

Versus.Az xəbər verir ki, məsələyə münasibət bildirən Azərbaycan Liberal Demokrat Partiyasının (ALDP) sədri Fuad Əliyev Avropa İttifaqının Ermənistana təsirini artırdığını deyib.

Partiya sədrinin sözlərinə görə, eynilə Ermənistan sərhədinə göndərilən yardım qrupunun ömrünün uzadılması da aparılan kompleks siyasətin tərkib hissəsidir:

"Bu mənada Qərblə Rusiyanın regionda mübarizəsinin getdiyini görməkdəyik. Ancaq Paşinyan yaxşı bilir ki, Rusiyasız Ermənistan heçdir. Ona görə hər çıxışında sülh müqaviləsinin Rusiya variantını imzalamağa hazır olduğunu bildirir, KTMT-dən çıxmağa cürət etmir, sülhməramlıların Qarabağda 15-20 il qalması üçün sənədə imza atmaq istədiyini qeyd edir. Odur ki, Ermənistan Qərbə sığınmaq istəsə də Rusiyanın orbitindən tam qopmaq gücü olmayacaq. Bunu heç Gürcüstan bacarmadı. Rusiyanın isə İrəvana daha çox təzyiq etmək imkanları mövcuddur”.

SEVDA
Versus.Az