“Şimali Koreya hakerlərin oğurladıqları pullarla nüvə silahı yaradır”

2023-cü ildə Şimali Koreya ilə əlaqəli hakerlər dünya üzrə ən azı 600 milyon dollar dəyərində kriptovalyuta oğurlayıblar.

Bu barədə “TRM Labs” şirkətinin informasiya təhlükəsizliyi üzrə ekspertlərinin yeni hesabatında bildirilib.

Ekspertlər hesab edirlər ki, ötən ilin son günlərində baş verən hadisələrin araşdırılmasından sonra dəymiş ziyanın məbləği 700 milyon dollara qədər arta bilər.

Məlumata görə, Şimali Koreya Xalq kriptovalyutanın oğurlandığı kiber insidentlərin təxminən üçdə birinə cavabdehlik daşıyır.

“TRM Labs” həmçinin qeyd edib ki, 2017-ci ildən bəri Pxenyanla əlaqəsi olan kibercinayətkarlar təxminən 3 milyard dollar dəyərində kriptovalyuta əldə ediblər.

Şirkət hesab edir ki, haker hücumları sanksiyalardan əziyyət çəkən Şimali Koreya üçün gəlir əldə edilməsinin ən vacib mexanizmlərindədir. Oğurlanan pullar kütləvi qırğın silahlarının və ballistik raketlərin yaradılması proqramının maliyyələşdirilməsinə sərf olunur.