Evsizlər üçün səyyar HAMAM-AVTOBUS

Türkiyədə İstanbul Böyükşəhər Bələdiyyəsi (İBB) istismar müddəti bitmiş avtobusları yenidən dizayn edərək, onları evsiz vətəndaşlar üçün səyyar hamam-vanna otağı və baxım mərkəzlərinə çevirib.

Versus.az Türkiyə mətbuatına istinadən xəbər verir ki, layihə ilk olaraq İstanbulun Fatih rayonunda fəaliyyətə başlayacaq.

İBB-nin sosial məsuliyyət sahəsindəki innovativ layihələrindən biri olan bu avtobusla bağlı bələdiyyə sədri Ekrem İmamoğlu açıqlayıb ki, bu innovativ layihə şəhərdə həyat şəraiti çətin olan və gigiyena obyektlərinə daxil olmaqda çətinlik çəkən şəxslər üçün hazırlanıb.

Yenidən təşkil edilən avtobuslar duş yerləri, paltardəyişmə məntəqələri, bərbər xidmətləri, istirahət yerləri, yemək otaqları və psixoloji dəstək bölmələri kimi bir çox ehtiyacları qarşılamaq üçün avadanlıqlarla təchiz edilmiş səyyar baxım mərkəzi funksiyasını yerinə yetirəcək.

Səyyar hamam avtobusu layihəsinin aprelin 1-dən etibarən Fatih rayonunda xidmətə başlayacağı və gələcəkdə İstanbulun digər bölgələrinə də yayılacağı bildirilib. Layihənin məqsədi şəhərdəki evsiz vətəndaşlara çatmaq və onlara əsas ehtiyaclarını ödəyə biləcək xidmət göstərməkdir.

Qeyd olunub ki, layihə həm də sosial inklüzivliyin və sosial həmrəyliyin gücləndirilməsinə töhfə verəcək model yaradır. Səyyar vanna otağı avtobusları evsiz vətəndaşların fərdi qayğı xidmətlərinə asanlıqla daxil olmalarını təmin etməklə onların həyat keyfiyyətini yaxşılaşdırmaq məqsədi daşıyır.