COVID-19 şübhəsi varsa KT nə vaxt aparılmalıdır?

Azərbaycanda dekabrın 14-dən bəri sərtləşdirilmiş karantin rejiminə baxmayaraq, koronavirusa yoluxanların sayı yüksək olaraq qalmaqda davam edir. Nikbinliyə səbəb olan tək şey, sağalmış insanların sayının artmağa başlamasıdır.

Bununla belə, həkimlərin dediklərinə görə, xəstəxanalarda reanimasiya və intensiv terapiya şöbələrində sıxlıq qalmaqdadır, ölənlərin sayı isə gündə 35-45 arası dəyişir.

Əlbəttə ki, bu, əhalinin psixoloji və emosional vəziyyətinə çox təsir göstərir. Sosial şəbəkələrdəki tibbi qruplarda “ağ ciyərlərin kompyuter tomoqrafiyası harada edilə bilər”, “bunu etməyə dəyərmi” və “sonra gec olmaz ki” kimi suallar çox verilir...

Sirr deyil ki, bir çoxu yoluxma barədə öyrənəndə təlaşa düşür, özünü müalicəyə başlayır, həkim təyinatı olmadan güclü təsir göstərən dərmanlar qəbul edir, kompyuter tomoqrafiyasından keçməyə tələsirlər ki, bu da sonradan kədərli nəticələrə səbəb olur.

Versus.Az xəbər verir ki, həkim-infeksionist Nicat Əzimli nə zaman kompyuter tomoqrafiyasının aparılmasının lazım olduğunu öyrəndiyini bildirib.

N.Əzimli koronavirus infeksiyasının yayıldığı ilk günlərdən pandemiya xəstəxanasında çalışır. Üstəlik, özü də koronavirus keçirib. 

 

“Kompyuter tomoqrafiyası yalnız həkimin təyinatı ilə tövsiyə olunur. Koronavirus infeksiyasının kiçik simptomları olduqda, həkimlə məsləhətləşmədən KT-nin diaqnostik metod kimi istifadəsinə ehtiyac yoxdur”, - deyə o vurğulayıb.

Həkimin sözlərinə görə, COVID-19-u göstərən simptomlar olduqda, vətəndaşlara sahə həkimi və ya infeksiya mütəxəssisi ilə əlaqə saxlamaları tövsiyə olunur. Bundan sonra həkim müayinənin taktikasını təyin edəcək - lazım olduqda PZR testi, qan analizi, rentgendən və ya kompyuter tomoqrafiyasından keçməyi məsləhət görəcək.

“KT - koronavirusu müalicə etmək üçün metod deyil, sadəcə bir diaqnostik müayinədir. Vətəndaşlar, ilk növbədə, həkimə müraciət etməli və yalnız bundan sonra lazımi müayinələrdən keçməlidirlər. Axı, tomoqrafiya müayinəsindən keçdikdən sonra belə, nəticələrini həkimə göstərməsi, onun da müvafiq müalicəni təyin etməsi lazımdır”, - deyə infeksionist vurğulayıb.

O, mövcud vəziyyətdə özünü müalicənin tövsiyə olunmadığını qeyd edib. /media.az/