Elşad Mirbəşir: “Uşaqlara, yeniyetmələrə yönəlik audiovizual materialar hazırlanmalıdır”

“Dövlətin, millətin təhlükəsizliyi bugünkü gənc nəslin tərbiyəsindən, düzgün yetişdirilməsindən asılıdır. Müasir dövrdə əsas istiqamətlərdən biri də uşaq və yeniyetmələrə yönəlmiş audiovizual kompanentlərin formalaşmasıdır və bu, xüsusi əhəmiyyət kəsb edir”.

Versus.az xəbər verir ki, bunu Milli Məclisin bugünkü iclasında deputat Elşad Mirbəşir Azərbaycanda özünə yer edən xarici təsirlərin qarşısının alınması fonunda etdiyi çıxışında bildirib.

E.Mirbəşir hesab edir ki, Azərbaycanda uşaq və yeniyetmələrin maraq dairəsini əhadə edən milli, mənəvi dəyərlərə söykənən audiovizual materiallar çox  azdır. Onun fikrincə, Azərbaycanla bağlı mühüm hadisələrlə bağlı filmlər, audiovizual materiallar hazırlanmalı, çəkilməlidir. Bu baş vermədikcə gənclərin məcburən kənar dəyərləri mənimsəməsinə təsirini göstərir.

E.Mirbəşir vurğulayıb ki, 4 günlük Aprel Döyüşləri Ali Baş Komandanın rəhbərliyi altında 2020-ci ilə verilən qələbəmizin anonsu idi. Məhz bu istiqamətdə, milli tarixi yaddaşın formalaşmasında çox işlər görməliyik:

“Uşaqlarda patriatizm formalaşmalıdır. Belə olduğu halda kənar təsirlərə məruz qalmayacaqlar. Uşaqlara, yeniyetmələrə yönəlik audiovizual materialar hazırlanmalıdır”.

Tahirə Qafarlı
Versus.az