“On minlərlə insan yoxa çıxdı...”

Vətəndaş qarşıdurmasının davam etdiyi Myanmada səfərbərlik qərarı elan edildikdən sonra on minlərlə kişi xaricə qaçmağa başlayıb.

Bu barədə “Washington Post” qəzeti məlumat yayıb.

Ordunun fevral ayında tətbiq etdiyi məcburi hərbi xidmət qanununa görə, ildə 60 min nəfərin hərbi xidmətə cəlb ediləcəyi gözlənilir. Lakin bu qərardan sonra hər ay on minlərlə kişinin Taylanda qaçdığı məlum olub.

BMT-nin Beynəlxalq Miqrasiya Təşkilatının rəqəmlərinə görə, mart ayında 120 min insan Myanmadan Taylanda qaçıb. Həmin şəxslərin təxminən 60 faizi özləri ilə heç bir sənəd aparmayıb.

Digər tərəfdən, Taylandın qeyri-qanuni keçidlərin qarşısını almaq üçün sərhəd patrullarını artırdığı və ələ keçirilən sənədsiz immiqrantları Myanmaya geri göndərdiyi vurğulanıb.

Qeyd edək ki, səfərbərlik çərçivəsində 18-35 yaşlı kişilər və 18-27 yaşlı qadınların iki il müddətinə hərbi xidmətə çağırılacağı açıqlanıb.

Myanma ordusu 7,7 milyonu qadın olmaqla, ümumilikdə 14 milyon vətəndaşın hərbi xidmətə yayarlı olduğunu bəyan edib.