Razi Nurullayev: "Özlərini "ana" müxalifət rolunda görənlər mənəvi cəhətdən yıpranıblar"

"Hər kəsin seçdiyi və doğru bildiyi siyasi yol var. Cəmil Həsənli və Milli Şura üzvlərinin dialoq iştirakçılarına bu şəkildə aşağılayıcı yanaşması biabırçı durumdur".

Versus.Az xəbər verir ki, bunu Milli Şuranın növbəti onlayn görüşündə Cəmil Həsənlinin hakimiyyətlə dialoqa müsbət yanaşan siyasi partiyalara ünvanladığı aşağılayıcı ifadəyə açıqlamasında deputat Razi Nurullayev bildirib.

R.Nurullayev vurğulayıb ki, müxalifət olmaq, siyasi yol seçmək üçün Cəmil Həsənlidən lisenziya alınası deyildi:

"Təəssüf edirəm ki, özlərini "ana" müxalifət rolunda görənlər mənəvi cəhətdən bu qədər yıpranıblar. Dialoqda iştirak edən çox hörmətli partiya sədrləri var. Onların ölkə və millət qarşısında əvəzedilməz əməkləri var. İnsanları siyasi baxış və davranışlarına görə təhqir etmək bolşevik təfəkkürünün uca nöqtəsidir".

Deputat Milli Şuranın üzvlərinə layiq olduqları təfəkkür sahiblərinin dili ilə cavab verib:

"Adolf Hitlerin təbliğat naziri Yozef Gebbels elə sizin üçün deyib ki, "Bolşevizm ən pislərin diktaturasıdır". Sizə inanmaq olarmı?

Bu partiya sədrləri arasında Parlamentdə təmsil olunan hörmətli millət vəkilləri də var. Onlar necə "tryapka" ola bilər? Onlar qanun qəbul edir, seçiciləri ilə görüşür, onlara köməklik göstərir və dövlətin qanunverici orqanın vasitəsilə dövlət quruculuğunda iştirak edir. Bəs siz nə qurursunuz? Qurduğunuz şey apardığınız iclaslarda eşitdiklərimiz və gördükləriumizdirsə, vay halınıza!"

SEVDA
Versus.Az