“Arsenal” argentinalı futbolçu ilə anlaşdı

İngiltərənin “Arsenal” klubunun ilk qış transferinin adı məlum olub.

“101 Great Goals” portalının xəbərinə görə, “topçular” axtardıqları pleymeyker mövqeyinə İngiltərə I divizionunda çıxış edən “Norviç”in argentinalı futbolçusu Emiliano Buendianı cəlb edib.

24 yaşlı futbolçu ilə 15 milyon funt sterlinq (16,7 milyon avro) məbləğinə razılıq əldə olunub.

Qeyd edək ki, Emiliano Buendia cari mövsüm 17 matç keçirib, altı qol vurub və yeddi məhsuldar ötürmə müəllifi olub. 21 turdan sonra “Norviç” Çempionşipə 43 xalla liderlik edir.

Premyer Liqada 17 xalla 15-ci pillədə olan “Arsenal”ın daha əvvəl “Brayton”un 20 yaşlı müdafiəçisi Tarik Lamptini heyətinə qatmağa çalışdığı da bildirilirdi. O, ispaniyalı cinah müdafiəçisi Ektor Belyerinin komandanı tərk edəcəyi halda, kluba cəlb olunmalı idi.