Milli Məclisin Mədəniyyət Komitəsinin sədri Qənirə Paşayeva Əməkdar mədəniyyət işçisi, Azərbaycan Aşıqlar Birliyi İdarə heyətinin və Azərbaycan Jurnalistlər Birliyinin üzvü, Filologiya üzrə fəlsəfə doktoru Elxan Məmmədli ilə Mədəniyyət Komitəsində görüşüb.
Versus.Az xəbər verir ki, millət vəkili Elxan Məmmədlini 75 illik yubileyi münasibəti ilə təbrik edib:
“Hörmətli Elxan müəllim,
Sizi, anadan olmağınızın 75 illiyi münasibəti ilə Mədəniyyət Komitəsi adından, şəxsən öz adımdan təbrik edir, Sizə möhkəm can sağlığı, yaradıcılıq uğurları arzulayıram!
Siz, folklorun, Azərbaycan aşıq yaradıcılığının, o cümlədən təcnis janrının bilcilərindənsiz. Təsadüfi deyil ki, AMEA-nın Folklor İnstitutunda “Aşıq yaradıcılığı” şöbəsinin müdiri, Azərbaycan radio və televiziyasında “Bulaq”, “Ustadnamə”, “Sazın-sözün sehrində”, “Gözəlləmə” və “Sarıtel” verilişlərinin müəllifi, aparıcısı olmusuz. Sizin monoqrafiyanız (“Təcnis sənətkarlığı”), 10-dan çox kitabınız (“Azərbaycan aşıq yaradıcılığında təcnis”, “Bir dənəm” (şeirlər), “Şair Nəbi Borçalı: həyatı, mühiti, sənəti” və b.) gün üzü görüb, 30-dan çox kitabın redaktoru, rəyçisi olmusuz.
Sizin özünüz haqqında da “Elxan Məmmədli-60”, "Elxan ömrü - Saz ömrü" adlı kitablar yazılıb.
Bütün bunlar Sizin məhsuldar elmi yaradıcı və ictimai fəaliyyətinizdən xəbər verir.
Sizi bir daha yubileyiniz və yeni təqvim ili münasibəti ilə təbrik edir, yeni uğurlar diləyirəm”!
Q.Paşayeva yubilyara Mədəniyyət Komitəsi adından Təbrik Məktubu və üzərində "Şuşa Azərbaycandır!" yazılmış qol saatı təqdim edib.
E.Məmmədli Komitə sədrinə səmimi görüş üçün təşəkkür edib.
Versus.Az