"Partiya sədrləri var ki, siyasətlə deyil, bizneslə məşğuldular"
Fuad Əliyev: "Azərbaycan siyasəti bu partiyalardan təmizlənməlidir"
"Qanun sərt formada qəbul olunmalıdır. Azərbaycanda normal fəaliyyət göstərən təxminən 18-20 partiya var. Yerdə qalanların böyük əksəriyyəti isə “bir sədri, bir möhürü olan partiyalar”dır. Nə seçkilərdə iştirak edirlər, nə də ki, mətbuatda dünyada, cəmiyyətdə gedən proseslərə fikir bildirirlər".
Versus.Az xəbər verir ki, bunu Azərbaycan Liberal Demokrat Partiyasının (ALDP) sədri Fuad Əliyev parlamentdə “Siyasi partiyalar haqqında” qanun layihəsinin ictimai müzakirəsi zamanı deyib.
ALDP sədri diqqətçəkən fikirlər irəli sürüb:
"Füzuliyə gedəndə birinci dəfə idi ki, bu qədər partiya sədri gördüm. Soruşanda ki, partiya nə vaxt yaranıb, deyirdilər ki, 1993-95-ci illərdə. Demək olar ki, partiyalar 30 ilə yaxındır qeydiyyata alınıbmış, biz isə onları n varlığını səfərə gedəndə gördük".
Fuad Əliyev vurğulayıb ki, elə partiya sədrləri də var ki, siyasətlə deyil, bizneslə məşğul olurlar:
"Bir yoxlama gələndə də partiya sədri olduğunu bildirir ki, gələnlər fəaliyyətini yoxlamasınlar. Bəzi partiya sədrləri isə dələduzluqla məşğuldur, ondan-bundan pul götürüb guya hakimiyyətə gələcəyini vəd edirlər. Bax belə partiyalardan Azərbaycan siyasəti təmizlənməlidir. Partiyaların cəmiyyətdə nüfuzu bərpa olunmalıdır. Siyasi partiyalar güclü, potensiallı olmalıdır və onlar hakimiyyətə hazır olduqlarını cəmiyyətə sübut etməlidirlər. Cəmiyyət siyasi partiyalara inanmalı, rişxəndlə yanaşmamalıdır. Hesab edirəm ki, bəzi düzəlişlər olunsa, yeni qanun Azərbaycanda fəaliyyət göstərən siyasi partiyaların inkişafını təmin edəcək. Bu qanun da buna xidmət edir".
SEVDA
Versus.Az
Xəbər lenti
Tarixi dostluq və mehriban qonşuluq
"Əlaqələr gələcəkdə daha da inkişaf etdiriləcək"