Türkiyə və Rusiya liderləri arasında 2018-ci ildə 7 təkbətək görüş olub, 18 dəfə telefonla danışıblar. Bugünkü görüş bir il ərzində 26-cı (?!) görüş sayıla bilər. İki ölkə tarixində ilk yaşanır.

Versus.Az xəbər verir ki, bu sözləri Moskvada Türkiyə Prezidenti Rəcəb Tayyib Ərdoğanla Rusiya Prezidenti Vladimir Putin arasında baş tutan görüşə münasibət bildirən politoloq Elxan Şahinoğlu deyib. O bildirib ki, liderlər Suriyanı müzakirə edib:

“Ərdoğan və Putin iki məsələnin üzərində xüsusi dayandılar. Birincisi, İdlib, ikincisi Suriya Konstitusiyasıdır. Əslində, Ərdoğan və Putin hər iki mövzu ətrafında fikir ixtilafı yaşamasalar da, hər iki problem həll olunmayıb. Nə İdlib terrorçulardan azad olunub və Ankara hələ ki, silahlı müxalifəti terrorçulardan ayıra bilməyib, nə də Suriya Konstitusiyasının necə olacağı ətrafında razılaşma var”.

Politoloq vurğulayıb ki, Ərdoğan və Putin dostluqlarını davam etdirir:

“Nə qədər ki, Vaşinqton həm Rusiya, həm də Türkiyəni sıxışdırmağa çalışır, Ankara-Moskva ikilisi çat verməyəcək, hətta Suriyadakı duruma baxış fərqli olsa belə. Əslində, Ərdoğanın Suriyaya baxışı Putinin xoşuna gəlmir, ancaq Rusiya prezidenti Suriyaya görə Ərdoğanla dostluqdan qopmaq istəmir. Çünki iki ölkə arasındakı münasibətlərdə pozitiv elementlər – ticarət mübadiləsi, atom elektrik stansiyasının tikintisi, “türk axını” layihəsi və C-400 anlaşması var”.

Versus.Az