"Azərbaycanın təqdim etdiyi siyahıda mən də varam"

Ermənistanın sabiq müdafiə naziri Seyran Ohanyan Azərbaycanın təhvil verilməsi üçün təqdim etdiyi cinayətkarların siyahısında özünün də ola biləcəyini açıqlayıb.

Versus.az xəbər verir ki, bu barədə o, yerli mətbuata açıqlamasında bildirib.

“Azərbaycan tərəfi Qarabağdakı bəzi şəxslərin təhvil verilməsi ilə bağlı siyahı təqdim edib. Yəqin ki, o siyahıda mən də ola bilərəm", - o deyib.

Ohanyan vurğulayıb ki, Qarabağın erməni nümayəndələri bu barədə danışıqlar aparacaqlar.

Ermənistanın “Hraparak” nəşri bir neçə gün öncə yazıb ki, Azərbaycan tərəfi ağır cinayətlərdə ittiham olunan bir qrup separatçının siyahısını hazırlayaraq Xankəndiyə - Qarabağ ermənilərinin nümayəndələrinə göndərib. Rəsmi Bakı siyahıda adları qeyd olunan şəxslərin humanitar dəhliz qarşısında Azərbaycanın hüquq-mühafizə orqanlarına təhvil verilməsini tələb edib. Qeyd edilir ki, “qara siyahı”ya qondarma “Artsaxın liderləri”, Xankəndidəki xuntanın qurulmasında xüsusi rol oynamış şəxslər, habelə bəzi hərbçilər daxildir.