Altı dövlətin liderindən BİRGƏ BƏYANAT

ABŞ, Böyük Britaniya, Almaniya Fransa, Kanada və İtaliya liderləri İsrailin Fələstinin HƏMAS qruplaşmasına qarşı özünü müdafiə etmək hüququna dəstək versə də, İsrail dövlətini beynəlxalq humanitar qanunlara riayət etməyə və mülki insanları qorumağa çağırıb.

ABŞ Prezidenti Co Baydenin Kanadanın Baş naziri Castin Trüdo, Fransa Prezidenti Emmanuel Makron, Almaniya Kansleri Olaf Şolts, İtaliyanın Baş naziri Corciya Meloni və Birləşmiş Krallığın Baş naziri Rişi Sunak ilə telefon danışığından sonra Ağ Ev birgə bəyanat yayıb.

Liderlər Qəzzada fələstinlilərə çatan ilk humanitar karvanların elanını alqışlayıblar. Onlar, həmçinin qida, su, tibbi xidmət və humanitar ehtiyacların ödənilməsi üçün tələb olunan digər yardımlara davamlı və təhlükəsiz çıxışı təmin etmək üçün regiondakı tərəfdaşlarla koordinasiyanı davam etdirməyi öhdələrinə götürüblər.

“Onlar münaqişənin yayılmasının qarşısını almaq, Yaxın Şərqdə sabitliyi qorumaq və siyasi həll və davamlı sülhə doğru çalışmaq üçün regiondakı əsas tərəfdaşlar da daxil olmaqla sıx diplomatik koordinasiyanı davam etdirməyi öhdələrinə götürüblər”, - deyə bəyanatda bildirilib.

Bayden, HƏMAS-ın İsrailə hücumlarından sonra münaqişə başlayandan bəri ilk iki humanitar yardım karvanının Qəzzaya daxil olmasını alqışlayıb.